Ich^a) Cristoffel Mayger vogt ze Altstetten² tun kûnt vnd vergich offenlich mit disem brieue fur mich vnd fur alle min erben allen, L die in sehent lesent oder horent lesen, daz ich mit guter vorbetrachtûnge vnd mit wolbedachtem mute verkofft han daz mad, L daz man etwenn genempt hât im Katzenzagel³ vnd daz man ietz nemmet im Flobach⁴, vnd vnnen vf an dez Rassen Êsch gât, andert L an den Flobach, mit allen rechten vnd mit aller zugehorde vnd aines staten êwigen koffes fur recht lêhen ze koffen geben han den êrbern wolbeschaidenn den phlegern vnd den maistern dez spittâls ze sant Gallen⁵ an den selben spittâl vnd zu dez selben spittâls handen vmb dru phûnt phenning guter Costenzer munse, die an minen offenn nûtz bewendet sint, vnd han och den selben phlegern vnd maistern daz vorgeschriben mad mit aller zugehorde von minen handen zu iro vnd zu dez obgedâchten spittâls handen vfgeben vnd geuêrtigot, wie recht sitte vnd gewonhait waz vnd alz es kraft vnd maht sol vnd mag han ietz vnd hienâch, vnd dar vmb so han ich mich dez selben mades mit aller zugehorde frylich vnd willeklich verzigen, also daz ich noch min erben noch niemant andre an vnser statt noch von vnsern wegen den vorgeschriben spittâl noch dehain sin phleger noch niemant von dez selben spittâls ald siner phleger wegen von dez vorgedâchten mades noch von dehainer siner zugehorde wegen nû hinnenhin niemer mêr sullent noch wollent ansprechen vftriben noch in dehain wise bekumberren weder mit gericht noch ân recht noch mit dehainen sachen ân gefarde. Ich han och gelobt bi guten truwen vnd loben mit disem brief fur mich vnd fur alle min erben, dez vorgeschribenn mades mit aller zugehorde vnd och dez koffes recht wer ze sinne nâch landes recht vnd den obgedâchten spittâl vnd sin phleger nâch dem rechten dâr vmb ze versprechenn vnd ze verstanne ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so han ich Cristoffel Maiger vogt dâ vorgenempt min insigel fur mich vnd min êrben offenlich an disen brief gehenket. Der geben wart ze Altstetten in dem jâre, do von Cristi geburt wârent druzehenhûndert jâr, nunzig jâr vnd dâr nâch in dem vierden jâre, an sant Bartholomeus âbent dez zwelfbotten.