Wir Wentzlaw von gotes gnaden Romischer kunig zu allen czeiten merer des reichs vnd kunig zu Beheim embieten L dem burgermeister rate vnd burgern gmeinlichen der stat zu sand Gallen vnsern vnd des reichs liben getrewen L vnser gnade vnd alles gut. Liben getrewen, vmb die gewonliche stewer, die ir vns vnd dem reiche jerlichen L vf sand Merteins tage zu geben pflichtig seit, heissen vnd gebieten wir euch ernstlichen vnd vesticlichen bey vnsern vnd des reichs hulden, das ir dieselbe stewre von dem nehstvorgangen sand Merteins tage dem edlen Hansen von Bodmen⁴ vnserm liben getrewen oder seinem boten genczlichen richtet vnd beczalet, wann so ir das getan habt, so sagen wir euch derselben stewer als von dem egenanten nehstvorgangen sand Merteins tage von vnsern vnd des reichs wegen genczlichen vnd gar qweit ledig vnd loze. Mit vrkunt ditz briefs vorsigelt mit vnser kuniclicher maiestat insigel. Geben zu Prage noch Crists geburt dreyczenhundert jare, dornach in dem virvndnewntzigistem jar, des nehsten vreytags noch sand Katherein tage, vnserr reiche des Behmischen in dem czweyvnddreissigistem vnd des Romischen in dem newnczehenden jaren.