Wir swester Elsbet Rvdlingerin von gottes genaden ze dissen zitten epttissin vnd der covent gemeinlich des klosters ze Tennikon¹ des L ordens von Cytels gelegen in Kostenzer bistum tunt kunt vnd vergehen offenlich mit disem gegenwirtigen brief allen den, die in an L sehent oder horent lessen, fur vns vnd alle vnsser nach komen, die wir och festklich hier zu bindint, das wir mit rat vnd guter L for betrachtung vnd einhelklich dvr meren nvtz vnssers gotzhus recht vnd redlich zekoffen geben hant der bescheidnen geistlichen frowen swester Margreten von Loinberg vnsser kofent frowen her Heinrichz von Loinber² elichi tochter zwen mvt kernen geltes vmb an eis zwentzig lb. h., die in vnsren notdvrftigen vnd redlichen nutz komen sint, vnd sol man der selben for genanden swester Margretun von Loinberg die selben zwen mut kernen jerlich richten ze sant Martis tag acht tag for hin alt acht tag nach hin an geferde, vnd sol die selben zwen mut k(ernen) bruchen vnd nutzzen, wie alt welen weg si sin notdvrftig ist, ze end ir wil, vnd wenn si von todes wegen ab gât, so sol der selben zwen mut k(ernen) einer ab gan vnd tot sin mit ir. Der ander mut sol man nach ir tot jerlich an die kilchen richten vff den selben for genanden sant Martis tag alt acht tag dar nach an geferde. Wer aber, das der selb mut k(ernen), der an die kilchen fallen sol, vss gestude, das ein mut den andren erluffe, den selben mut k(ernen) sol denn den herren von Cappel³ des jares vber uss fallen. Wenn och die for genand Margret von todes wegen ab gat vnd der for genand mut kern an die kilchen fellet, so sol och jerlich ein jeklichi kustrin zu des for genanden her Heinrichtz selgen von Loinberg jarzit ein mêss frvmen. Vnd ze einer waren sicherheit so henk ich die for genand eptissin vnd der coffent vnsser ingesigel an disen brief. Der geben wart, do man zalt M^o.CCC. vnd LXXXX jar, dar nach in dem fvnften jar, an dem zwelften tag.