Ich^a) Vlrich Schaffhuser wonhaft ze Swainberg¹ tun kunt vnd vergich offenlich mit disem brief allen, die in ansehent lesent oder horent lesen, alz mich die fromen wisen der burgermaister vnd der rat ze sant Gallen gehaimot vnd in iro vanknust vnd banden hatten vmb daz L ich mich wider den burgermaister vnd wider den rat vnd gemain statt da selbs gesetzt vnd in wider rehtz ab gesait vnd trowlich zu geredt hatt, won aber su mich begnâdot hant vnd mich durch des erwirdigen fursten mines gnadigen herren abt Chun abt des gotzLhus ze sant Gallen² vnd ander erber lut vnd miner frunde ernstlicher bett ledig vnd vss der vanknust gelassen hant, darumb so han ich willeklich frilich vnd vnbetwungenlich vngebunden vnd vngefangen mit guter vorbetrahtung offenlich gesworn ainen L gelerten aide liplich zu got vnd zu den hailigen mit vf gehabenen vingern, vmb die vorgedahten vanknust strâffung vnd getat der vorgedahten des burgermaisters dez rates vnd aller burger vnd burgerinen gemainlich der stat ze sant Gallen vnd iro ieklichs besunder vnd mit namen aller dero, wer die sint, die an der selben vanknust schuld gehebt hant hainlich oder offenlich mit raten ald mit getaten oder in dehain wis, luter gantz vnd gut frund ze sinne vnd alle min frund inen darumb ze frund ze gewinnen ân allen furzug vnd die selben vanknust niemer ze andenn noch ze aferrenn weder mit gaistlichem noch mit weltlichem geriht noch ân geriht weder mit worten noch mit werken noch in kain wis noch nieman andre an miner statt noch von minen wegen ân alle gevarde. Ich han och in den vorgedahten aide genomen vnd gesworn, war daz ich dehainer lay stoss sach oder ansprachen hetti vff disen huttigen tag, alz dirre brief ist geben, oder nv hinnenhin iemer gewunni zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz da selbs burger ald die noch da selbs burger werdent, wenn vnd alz dik daz beschach, vnd wolt ich danne ie darumb rehtes niht enbern, daz ich danne ie darumb rehtes phlegen vnd reht von in nemen sol vnd wil ze sant Gallen in der stat vor irem geriht vnd niendert anderswa won nach der selben statt reht vnd gewonhait, ez war dann, daz ich da selbs rehtlos gelassen wurdi vnd daz och das da kuntlich wurdi, so ist mir behalten vnd in dem aid vss gelassen, daz ich das reht ie danne, von dem ich rehtlos gelassen bin, anderswa suchen sol vnd mag, da ez danne billich vnd muglich ist, ân alle geuarde. Beschach aber, daz got niht welle, daz ich den vorgedahten aide iemer vber fur ald ieman von minen wegen an dehainen vorgeschribenn stuken in dehain wîs, so sol ich den selben dem burgermaister dem rat vnd gemainer statt ze sant Gallen hundert phunt phenning guter Costentzer munse ie zwen gut vnd genam haller fur ainen Costentzer phenning gantzlich verfallen sin ze gebenn ân alle widerrede, vnd han inen vmb daz selb gut zu mir ze merer sicherhait ze rehten burgen geben vnd gesetzt diz nachgenanten erbern lut Elzbethen min êlichen husfrowen, Petern von Swainberg minen bruder, Cunrat Schaffhuser minen bruder, Hugen Banwart minen ohain, Rudolf Aher von Burgow³, Hainrich Koler von Gossow⁴, Johansen Ransperg, Nycolausen Wissen, Cunraten von Rain⁵, Johansen Kaser, Rudolf Schedler, Vlrich im Tân⁶, Hainrichen Huber, Johansen Wissen, Jaclin Brantman, Cunrat Schedler, Cunrat Buler all von Burgow, Cunrat Muller, Johans Kurer der jung baid von Wolfreswille⁷, Vlrich vnd Hainrich im Bongarten gebruder, Hainrich am Werd, Herman Wetzels, Hainrich Schiltkneht, Berschi Vorster, Vlrich Cuntzen, Jacli Hubscharudis sun, Vlrich Jud, Cunrat Helffenberg, Vlrich Zaner, Cunrat Entziswille, Hainrich Haini, Vlrich an der Wis genant Redthas, Rudolf Ransperg, Hans Gerwig von Honberg⁸, Hans Berschis von Gebraswille⁹, Hans Adelberg, Vlrich von Mos baid von Honberg, Hans Huber, Jacli Natter, Hans Waltis baid von Swainberg, Jacli Schnider von Flawille¹⁰, Cunrat von Boksperg¹¹, Burgi Stetter, Rudolf Lener, Hainrich Koler, Egli Tanner baid von Arnang¹², Vli Buhelli ab der Egg¹³, Johans Brugger von Tuffenow¹⁴, Frid­rich Murer von Obernburen¹⁵, Hans Gamperli, Johans Werlis baid von Hetzenwille¹⁶, Cunrat Hofman, Hans Rot Ermel, Jacli Byschoff, Vli Hantsch, Vlrich Vorster all driie von Arnang, Johans Schmit von Albersperg¹⁷, Hainrich von Gaigelmar¹⁸, Jaclin Spilman, Herman Hennberger vnd Johansen Vederlin, die hant alle vnuerschaidenlich gelobt ieklicher besunder mit siner truwe, ob daz wari, das ich in des selben gutes verfieli, alz vor beschaiden ist, daz si dann alle vnuerschaidenlich den selben dem burgermaister dem rat vnd gemainer stat ze sant Gallen die selben hundert phunt phenning der vorgeschribenn munse oder ander lay munse dafur, die dann ze sant Gallen in der stat geng vnd genam ist, ân geuarde gantzlich geben weren vnd rihten sont vnd in och gebunden sin sont, daz selb gut gantzlich ze gebenn vnd ze rihtenn bi der ersten vordrung ân allen furzug vnd widerrede. Vnd war, daz ich ald die obgenanten burgen inen daz selb gut danne niht rihtint vnuerzogenlich, so hant die selben der burgermaister der rat vnd die burger gemainlich ze sant Gallen vnd ir ieklicher besunder vnd iro helffer, wer die sint, friies vrlob volkomen reht vnd gewalt, daz su mich vnd och die obgenanten burgen darumb phenden noten heften vnd angriffen sont vnd mugent an luten vnd an gutern in stetten in dorffern vff wasser vnd vff dem lande mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent ald wellent vnd in fugklich ist, vber alle frihait buntnuss lantfrid gnâd vnd gewonhait, alz vil vnd alz dik, vntz daz si der selben hundert phunt phenning der vorgeschribenn munse vnd och dez schaden, in den si vnd iro helffer von des selben phendens notens heftens vnd an griffens wegen koment, gantzlich gewert vnd vsgeriht werdent, vnd sol mich noch die obgenanten burgen noch min noch der obgenanten burgen lut noch guter hie vor noch hie wider niht schirmen noch gut sin weder babstlichs kunglichs noch kayserlichs geriht gewalt gesetzt gnâd frihait kain acht noch banne kain lantfrid kain buntnust kain gesellschaft kain burgreht kain gewonhait kain fund noch gesetzt, so ietz ist oder her nach funden gesetzt oder erdaht wurd von babsten kaysern kungen herren oder stetten, noch enkainer lay ander sach behelff schirm noch furzug, won wir vns dez alles verzigen hant, ez war danne, daz mich die obgenanten burgen danne inrent dem nahsten manot nach der ersten vordrung lebent oder todt ainem burgermaister vnd dem rat gemainlich ze sant Gallen antwurtint gen sant Gallen in die statt in solichi band vnd gewalt, da su min sicher sint, so sont danne die selben obgenanten burgen alle vmb daz vorgeschriben gelt vnd gelubt ledig vnd los sin. Ich han och in den vorgeschribenn aide genomen vnd gesworn, die obgenanten burgen alle gemainlich vnd ieklichen besunder gantzlich ze losenn vnd vnschadhaft ze machenn von allem dem schaden, in den su kament von diser burgschaft wegen, vnd han in och erlobt minen lib vnd min vnd miner erben gut, ob ich enbin, darumb an ze griffenn vnd ze phendenn in aller der wise alz den obgenanten burgern vnd der stat ze sant Gallen, alz da vor an disem brief geschriben staut, vntz in iro schad gantzlich abgelait vnd vergolten wirt. Vnd des alles ze offem warem vrkunde vnd stater sicherhait aller der vorgeschribenn dinge vnd vergicht so han ich Vlrich Schaffhuser da vorgenant erbetten den ersamen Johansen Entziswiller vnder vogt ze sant Gallen¹⁹, daz er sin insigel fur mich vnd min erben gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Johans Entziswiller offenlich vergich an disem brief mir vnd allen minen erben gantzlich vnschadlich. Darnach veriehent wir die obgenanten burgen alle gemainlich ainer gantzen warhait aller der dinge, son von vns an disem brief da vorgeschriben stant. Vnd ze merer sicherhait der selben dinge so haben wir die obgenanten burgen Rudolf Aher vnd Hainrich Koler von Gossow och vnseru aigenu insigel offenlich fur vns gehenkt an disen brief. Vnd won wir die andern obgenanten burgen alle aigener insigel niht haben, so habent wir erbetten die erbern wolbeschaidenn Kaspar Volin hofamman²⁰ vnd Nycolausen Rupreht stat amman ze sant Gallen²¹, daz su baid iru insigel fur vns gehenkt hant an disen brief, vnder der selben insigel wir vns willeklich gebunden hant, des och wir die obgenanten Kaspar Voli hofamman vnd Nycolaus Rupreht stat amman offenlich veriehen an disem brief vns vnd allen vnsern erben gantzlich vnschadlich. Diz beschach vnd ward dirre brief geben ze sant Gallen in der stat in dem jar, do man von Cristus geburt zalt druzehenhundert jâr, nunzig jar vnd darnach in dem funften jâre an dem nahsten fritag vor aller hailigen tag.