Ich^a) Johans Frohlich, den man nempt Lete, burger ze sant Gallen tun kunt vnd vergich offenlich an disem brief L allen, die in ansehent oder horent lesen, daz ich mit wolbedahtem mut willeklich frilich vnd vnbetwungenlich L offenlich gesworn han ainen gelerten aide liplich ze got vnd ze den hailigen mit vfgehabenen vingern, L war daz ich dehainer lay zuspruch sachen stoss oder ansprachen vff disen huttigen tag hetti oder nv hinnenhin iemer gewunni zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz da burger ald si werdent noch da selbs burger, wenne vnd alz dik das beschach vnd wolt ich ie danne darumb rehtes niht enbern, das ich danne ie darumb rehtes phlegen vnd reht von in nemen sol vnd wil ze sant Gallen in der statt vor irem geriht vnd niedort anderswa won nach der selben statt reht vnd gewonhait, ez war danne, daz ich da selbs rehtlos gelassen wurd vnd das och das da kuntlich wurdi, so ist mir behalten vnd in dem aide vss gelassen, daz ich das reht ie danne, von dem ich rehtlos gelassen bin, anderswa suchen sol vnd mag, da es danne billich vnd muglich ist, ân alle geuarde. Vnd des alles ze offem warem vrkunde so han ich Johans Frolich da vorgenant erbetten den wolbeschaidenn Cunrat von Watt¹ och burger ze sant Gallen, daz er sin insigel fur mich gehenkt hat an disen brief, vnder des selben insigel ich mich willeklich gebunden han, won ich aigens insigels niht han, des och ich obgenanter Cunrat von Watt offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten zinstag nach sant Mathies tag des hailigen zwelfbotten in dem jar, do man von Cristus geburt zalt druzehenhundert jâr, nunzig jar vnd darnach in dem sechsten jare.