Ich Cunrat Senn ze disen zytten sesshafft vff dem sennhoffe ze Tattenwyle¹ tun kunt vnd vergich offennlich mit disem brieff fur mich vnd fur alle min erben vnd nachkomen allen den, die in sechent lesent oder horent lesen, dz ich mit gutter vorbetrachtung vnd mit wolbedachtem mutte den ersamen minen gnedigen frowen der aptissinen dem conuent vnd dem cappitel gemainlich ze Maggenow² Cytels ordens in Costentzer bistumb gelegen lutterlich durch gott vnd durch miner sele hailes wyllen recht vnnd redlich vnnd ledeklich geben han die wyse ze Entzenschwyl³ im riett gelegenn mit grunndt mit gradt mit wasen mit zwy mit stegen mit wegen mit wasser mit wasserflussen mit allen rechten nutzen vnd gewonhaiten vnd mit allen den zugehorden, so von recht ald von gewonhait dar zu vnd dar in gehorent vnd vntz her gehort hanndt, vnd gib inen vnd allen iren nachkomen die selben jetzgeschribnenn wysen mit aller zugehorden ledeklich mit disem brieff an dz vorgeschriben gotzhuß ze Maggenow in des vnd zu des selben gotzhuß gewalte nutze vnd hannden, die selb wyß min recht vogtbar aigen gewesen ist, vnd han ouch des egedaachten gotzhuß besorgern die vorgeschribnen wysen mit aller zugehorden zu des vnd in des selben gotzhuß ze Maggenowe gewalte nutze vnd hannden an offner des richs strasse vor allichen vnd gemainen gerichte frylich vnd wyllenklich vnd ledeklich von minen vnd vsser minen hannden vffgeben vnd geuertigot, wye mit gemainer vrtail ertailt ward, vnd mit allen den worten vnd getatten, wye recht sytt vnd gewonhait wz, dz es nach dem rechten wol krafft vnd macht hat vnd haben sol vnd mag jetz vnd hie nach, vnd dar vmb so han ich mich frylich vnd wyllenclich enntzigen von minen vnd vsser minen handen in des vnd zu des vorgeschribnen gotzhuß vnd siner besorger handen vnd verzich mich mit disem brieue ganntzlich vnd gar fur mich vnd alle min erben vnd nachkomen aller aigenschafft lehenschafft aller recht vordrunngen vnnd ansprachen gaistlichs vnd weltlichs gerichtes, so ich vnd min erben vnd nachkomen an der vnd zu der vorgeschribnen wysen ald zu dehainer ir zugehorde ye gehept hanndt ald hie nach jemerme gehaben oder gewunnen mochtint. Ich han ouch gelopt by miner truwe vnd loben mit disem brieue fur mich vnd fur alle min erben vnd nachkomen, der vorgeschribnen wyse mit allen rechten vnd mit aller zugehorde vnd ouch der selben gabe fur recht vogtpar aigen recht wer ze sinde nach des lanndes recht vnd dz vorgeschriben gotzhuß vnd sin besorger, wer die sind ald nach werdint, on allen iren schaden nach dem rechten dar vmb ze versprechen vnnd ze verstannde an allen gerichten gaistlichen vnnd weltlichen vnnd an allen stetten gen aller mengklichem, wenn wo vnd wye dick sy des nach dem rechten notturfftig sind oder dar vmb angesprochen geschadgett geuertigott oder vffgetryben werdint, on alle geuarde. Vnnd ze offem warem vrkunde vnnd statter sicherhait aller dirre vorgeschribnen dinge vnd vergicht so han ich vorgenempter Cunrat Senn, won ich aigens insigels nit hatt, mich willeklich gebunden vnder des fromen wisen Cunratz von Eppenberg⁴ insigel, der dz selbe sin insigel von miner erntschlicher bette wegen fur mich vnd fur min erben vnd nachkomen offennlich an disen brieff gehenckt, vnnd des ouch ich jetzgenempter Cunrat von Eppenberg vergich mir vnd minen erben gantzlich vnschadlich. Dis geschach vnd ward dirre brieff geben ze Maggenow in dem jare, do von Cristi geburt warent M^oCCC^oLXXXX jar vnd darnach in dem VI jare, an sant Gregorien abenndt.