Wir^a) .. die priorin vnd gemainer couent des gotzhus ze Tozz¹ sant Dominicus orden in Costentzer bystum veriehen vnd tunt L kunt allermenglichem mit disem brief, daz wir mit guter wissentklicher vorbetrahtung vnd beschaidenhait mit gemainem L ainhelligem rat vnsers capitels fur vns vnd fur alle vnser nachkomen ains vngeuarlichen vnwiderrufklichen koffes verLkoft haben die wolbeschaidnen kneht Hansen vnd Rudin von Wentzikon² gebruder jetz sesshaft vff Wilberg³ Johansen von Wentzikon elich sun mit lib vnd mit gut vnd mit aller zugehord, die baid vnsers obgenanten gotzhus recht aigen warent. Vnd haben die mit gunst wissen vnd willen aller vnser obern vnd aller der, so wir nach vnsers gotzhus vnd ordens recht sitten vnd gewonhait dar zu bedorften, redlich vnd recht ze koffent geben dem hohwirdigen fursten abt Cunen von gottes gnaden des gotzhus ze sant Gallen⁴ vnd allen sinen nachkomen zu desselben sines gotzhus handen vnd gewalt vmb zwaintzig pfund guter vnd genamer Jtaliger haller, dero wir och aller gantzlich vnd gar nach vnsers gotzhus nutz vnd nach vnserm willen von den obgenanten Hansen vnd Rudin von Wentzikon bezalt syen. Vnd haben im vnd sinem gotzhus dieselben zwen kneht mit lib vnd mit gut vnd mit aller zugehord fur recht aigen fur vns vnd fur alle vnser nachkomen vnd fur daz obgenant vnser gotzhus ze Tozz ledklich vnd frilich vffgeben vnd zu sinen vnd siner nachkomen vnd zu des obgenanten sines gotzhus ze sant Gallen handen vnd gewalt braht vnd geuertgot vnd sy der in liblich nutzlich gewaltsami vnd gewer gesetzt, alz recht sitt vnd gewonlich waz vnd alz es nach vnsers gotzhus vnd ordens vnd och nach des landes recht vnd gewonhait billich vnd von recht kraft vnd maht hat vnd haben sol nu vnd hienach. Vnd haben vns och hier vber gegen demselben Cunen von gottes gnaden abt des gotzhus ze sant Gallen gegen allen sinen nachkomen vnd gegen demselben sinem gotzhus fur vns vnd fur alle vnser nachkomen vnd fur daz obgenant vnser gotzhus ze Tozz ledklich vnd frilich verzigen vnd entwert vnd verzihen vnd entweren vns och redlich vnd recht mit disem brief aller aigenschaft aller lehenschaft aller manschaft aller gewer aller kuntschaft aller besatzung aller zugnust lut vnd briefen aller vall vnd gelazz aller erbschaft vnd erbtailes aller gewaltsami vnd dienst alles rechten gaistlichs vnd weltlichs gerichts aller rechtung vordrung vnd ansprach, so wir oder vnser nachkomen oder ieman andra von vnsern oder vnsers gotzhus oder ordens wegen zu den obgenanten zwain knehten zu ir lib oder zu ir gut mit aller zugehord ie gehatten oder hie nach iemermer gewinnen mohtent von recht oder von gewonhait oder von dehainerlay andren sach wegen, so ieman erdenken kan, an geuard. Wir sollent vnd gelobent och vestenklich mit disem brief fur vns vnd fur alle vnser nachkomen vnd fur daz obgenant vnser gotzhus, der obgenanten zwaiger kneht mit lib vnd mit gut vnd mit aller zugehord fur aigen vnd dis kofs in aller vorgeschribnen wis des obgenanten abt Cunen des gotzhus ze sant Gallen aller siner nachkomen vnd desselben sines gotzhus gen allermenglichem allenthalben vff gaistlichem vnd vff weltlichem gericht, wenn wa vnd wie dik si oder die obgenanten lut des noturftig sint vnd dar vmb mit dem rechten von ieman vffgetriben oder angesprochen wurdent, recht weren ze sint nach dem rechten vnd nach des landes sitten vnd gewonhait an geuard. Vnd des alles ze offem vrkund der warhait vnd ze ainer bestaten sicherhait so haben wir .. die priorin vnd gemainer couent des gotzhus ze Tozz da obgenant vnsri insigel fur vns vnd fur alle vnser nachkomen offenlich gehenkt an disen brief. Der geben ist an sant Gregorien des hailgen bapsts tag, do man zalt von Cristi geburt druzehenhundert vnd nuntzig jar, dar nach in dem sehsten jar.