Allen^a) den, die disen brief ansehent oder horent lesen, kund ich Rudolf von Edegswille schulthaiz ze Wil¹ L vnd vergich offenlich mit disem brief, daz fur mich kam ze Wil in der statt in offen gericht vff hut disen L tag, alz dirr brief geben ist, do ich daselbs offenlich ze gericht sazz, die erber frow Elsbetha von Var JoLhansen salgen von Var elichi wirtenn Eberhart Kofmans salgen elichi tohter mit Johansen Aster irem vogt, mit dem si do vber dis nachgeschribnen sach beuogtot wart, alz gericht vnd vrtail vor mir gab, vnd offnot da mit demselben irem vogt vnd mit ir fursprechen vnd sprach, daz si lieblich vnd fruntlich vnd och gantzlich vnd gar nach ir willen verricht vnd veraint ware mit dem erbern herren her Johansen dem Schmid lutpriester vnd tegan ze Wil, der och do zegegen stund, vnd mit allen den, die zu dirr sach gehaft warent, vmb alle stozz vnd misshellung, so si vntz har ie mit inen gehebt hetti von der guter vnd selgerats wegen, so Johans Kofman ir bruder salig an sinem tod durch got geben vnd gesetzt hetti vnd dasselb selgerat vsszerichtent dem obgenanten her Johansen Schmid enpfolhen hetti, also daz ir dieselben guter alli von derselben gab vnd selgeratz wegen nu hinnan hin gantzlich ledig sin soltent vnd warent vnd daz si durch des obgenanten Johansen vnd och Hainrichs der Kofman ir bruder salgen vnd durch Adelhaiten iro muter salgen selan willen setzen solti vff iren aignen hof ze Wuppnow² gelegen, den man nempt des Kofmans gut vnd den ietz der Struss buwet, den si von dem egenanten Johansen irem bruder ererbt hetti, sehs viertel kernen gutes vnd genames Wiler messes iarliches vssgendes zinses an allen abgang vnd mindrung vor vzz vor allen nutzen vnd zinsen desselben gutes. Also daz ainem lutpriester ze Wil desselben kernen iarlichen dru viertel werden soltent, von denselben dru vierteln er sinem helfer iarlich ainen schilling pfen(ning) geben vnd och ain kertzen vnd ain opfer dar zu, alz ze Wil gewonlich ist iarzit ze begent, er och geben solti zu ir iarzit. Vnd solte och ainem sigristen ze Wil vier pfen(ning) dar von geben, daz er daz iarzit dar vmb lute. Vnd solte och von dem obgenanten kernen iarlich ainem frumesser ze Wil ain viertel kernen, ainem pfrunder vnser frowen altar ze Wil ain viertel kernen vnd ainem schulmaister ze Wil ain viertel kernen werden, von demselben viertel kernen ain schulmaister iarlich geben solte sehs pfen(ning) an die kilchen ze Wil. Vnd soltent ain lutpriester mit sinem helfer ain frumesser vnd ain pfrunder vnd och ain schulmaister mit sinen schulern der obgenanten Johansen vnd Hainrichs der Kofman vnd Adelhaiten iro muter salgen vnd och der obgenanten Elsbethen von Var, wenn si erstirbt, iarzit iarlichen ainest began in der nahsten wochen vor aller hailigen tag mit ainer gesungnen vigilie mit nun letzgen vnd mit ainer gesungnen selmezz ze sant Peter ze Wil³ an geuard. Welher aber vnder den egenanten personen daz iarzit an redlich sach nit also iarlich hulfe began, dem sol ieklichs iares, so er dar an sumig wari, fur die vigilie ain halb viertel kernen vnd fur die mess och ain halb viertel kernen abgan, vnd sol ain lutpriester denselben kernen gelichlich tailen vnder die, die daz iarzit begangen hant, an geuard. Vnd nach der offnung vnd vergicht do satzt die obgenant Elsbetha von Var mit ir vnd mit ir obgenanten ires vogtes handen die obgenanten sehs viertel kernen iarlichs geltz mit gelerten worten an des gerichtes stab in aller vorgeschribnen wis vff den obgenanten hof, alz recht sitt vnd gewonlich waz vnd alz nach miner frag mit gemainer vrtail ertailt wart, vnd setzt bewist vnd versorgot si och redlich vnd recht fur sich vnd fur alle ir erben mit disem brief vff denselben hof vnd gut mit aller zugehort in aller vorgeschribnen wis vnd bedingnust luterlich an geuard. Vnd des alles ze offem vrkund vnd staten sicherhait so han ich obgenanter schulthaiz min insigel von des gerichtes wegen offenlich gehenkt an disen brief. Dar nach vergich ich obgenante Elsbetha von Var vnd Johans Aster ir vogt ain gantz warhait aller vorgeschribnen ding, so von vns an disem brief geschriben stant. Vnd ze merer sicherhait derselben ding so haben wir och baidi vnsru aigni insigel doch mir ietzgenanten Johansen Aster vnd minen erben vnschadlich offenlich gehenkt an disen brief. Der geben ist ze Wil mit rechter vrtail an der nahsten mitwochen nach sant Gregorien tag, do man zalt von Cristi geburt druzehenhundert vnd nuntzig jar, dar nach in dem sehsten jar.