Wir^a) graff Friderich von Toggenburg¹ here ze Brettengo² vnd ze Thafâs³ tugint kunt vnd vergehent L des offenlich mit disem brieff von des jarlichen geltes wegen der hundert pfunt haller geltz, so L die wollerbornen heren graff Rudolff vnd graff Hug von Werdenberg vnd graff Albrecht iro L vetter herren ze dem Hailgenberg⁴ jarlichs gebunden sint ze gebent dem wolbeschaidnen Hainrichen Cristan burger ze Costentz halb vff sant Johans tag des Thoffers vnd dz ander halbtaill vff sant Martins tag in dem herbestt, vnd dar vmb mit inen angult gewesen ist her Walther salig von der Alten Clingen⁵ in Turgo frie, alz der brieff wist vnd seit, der dar vber besigelt geben ist, vnd won der selb her Walther salig abgangen ist, dar vmb so sigent wir von der selben graffen von Werdenberg bett wegen des selben Hainrichs Cristans vnd siner erben fur vns vnd vnser erben vmb das obgenant jarlich gelt an des selben her Walthers salgen statt angult worden vnd habent och ge­sworn ze laistent vnd ze vollefurent alles des, so sich der obgenant her Walther salig von Clingen verbunden hett vnd alz das alles des selben Hainrichs des Cristans hoptbrieff wist vnd seit, vnd verbindent vns och des mit disem brieff. Vnd des alles ze warem vnd offem vrkunt aller dirre ding gebent wir obgenanter graff Friderich von Toggenburg vnser insigell an disen brieff. Der ist ze Costentz geben, do man von Cristes geburt zalt drutzechen hundert jar, darnach in dem sechs vnd nuntzigosten jar, an sant Vlrichs abend im howatt.