Ich^a) Cristoffel Mayger von Altstetten¹ tun kunt vnd vergich offenlich mit disem brief allen, die in ansehent lesent L oder horent lesen, das fur mich kam ze Altstetten in dem Rintal an dem nahsten mantag vor sant L Vlrichs tag, do ich an offem verbannem geriht offenlich ze geriht sass, der beschaiden Johans Warman L Eglolf Warmans salgen elicher sun burger ze sant Gallen, vnd batt mich da der selb Johans Warman mit sinem fursprechen eruarn an ainer vrtail, wie lang ain man sinu lehen ligendes hof gut in nutzlicher gewer inne haben must gegen luten, die zu ir tagen komen warint vnd in landes warint vnd mit ainem ze kylchen ze haingarten vnd ze margt giengint, da mit er die selben sinu hofgut vnd lehen mit der gewer behaben moht. Das tet ich, vnd ward ertailt mit gemainer vnzerworffner vrtail, wa ain man sinu lehen vnd hofgut in nutzlicher gewer hetti ain jar sechs wuchen vnd driie tag, also das im das niemant in dem zil mit dem rehten angesprochen hetti vnd er och daruber sinen willigen lehenherren hetti, das der denne dannenhin die selben sinu lehen vnd hofguter mit der gewer vnd mit siner ainigen hand volleklich behebt hett gegen allen den, die in landes warint vnd zu ir tagen komen warint vnd mit ainem ze kylchen ze haingarten vnd ze margt gangen warint. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so han ich Cristoffel Mayger rihter da vorgenant von des gerihtes wegen min insigel offenlich gehenkt an disen brief, won ez och mit gemainer vrtail ertailt ward, das ich es tun solt. Diz beschach vnd ward dirre brief geben ze Altstetten an dem vorgeschribenen mantag in dem jar, do man von Cristus geburt zalt druzehenhundert jâr, nunzig jar vnd darnach in dem sechsten jare.