Wir^a) Cun von gots gnaden abt des gotzhuses ze sant Gallen¹, das an alles mittel zu gehort dem stul ze L Rome, sant Benedicten ordens in Costentzer bistum veriehen vnd tund kunt aller menklich mit disem brief, L dz fur vns kam ze Wil² in vnsers gotzhus statt vff den tag, alz dirr brief geben ist, die erber frow Margareta Hasin L Cunrats Haberkorns burgers ze Wil elichu wirtin mit dem selben irem elichen man, vnd offnot da vor vns die selb Margaret Hasin vnd sprach, dz si von vns vnd vnserm gotzhus ze lehen hetti ain wisen vff Wilmat³, der ain manmad ist, zewischend Hainis Buwils salgen wis vnd ainer wisen, die in der selben Margareten Hasinen schupuzz gehort, gelegen. Vnd batt vns die selb Margaret ernstlich, das wir die selben wisen mit aller zugehort ledklich von ir vf namen woltind an vnser hand vnd die selben wisen wider lihen woltend ir vnd dem egenanten Cunraten Haberkorn irem elichen man inen baiden gemainlich ze lehen vnd ze gemaind. Dar vmb erhorten wir genadklich ir ernstlich gebett vnd namend do ze stett dieselben wisen mit aller zugehord von der egenanten Margareten Hasinen ledklich vf an vnser hand vnd habind die selben wisen mit allen rechten vnd zu gehorden wider vmbhin gelihen vnd lihend si och redlich vnd recht mit disem brief den vorgenanten Margareten Hasinen vnd Cunraten Haberkorn irem elichen man inen baiden gemainlich ze lehen vnd ze rechter gemaind vnd in gemaind wis an gevard, doch vns vnd vnsern nachkomen vnd vnserm gozhus an vnsern rechten vnd guten gewonhaiten vnschadlich. Wir haben och derselben Margareten Hasinen wissentklich die gnad getan vnd recht geben, das si die vorgenanten wisen mit aller zugehord in lehens wis an aller menklichs sumen inne haben vnd niessen sol vnd mag in glicher wis, als ob si ain man oder ain knab war, an geuard. Vnd ist dis alles geschehen vnd volfurt mit aller gewarsamy worten vnd werken, so darzu gehorten vnd als es nach vnsers gotzhus recht vnd gewonhait billich kraft haut, an geuard. Vnd des alles ze warem offnem vrkund so haben wir obgenanter apt Cun dez gotzhus ze sant Gallen vnser insigel offenlich gehenkt an disen brief. Der geben ist ze Wil in der stat an sant Katherinen abent, do man zalt von Cristi geburt druzehen hundert vnd nuntzig iar, dar nach in dem sechsten jar.