Ich Eglolff von Altstetten¹ der elter tun kunt vnd vergich offenlich mit disem brieff fur mich vnd fur all min erben vnd nachkomen allen, die inn ansechent lesent oder horend lesen, das ich mit guter vorbetrachtung vnd mit wolbedachtem mut von miner rechten not wegen recht vnd redlich verkoufft han die eigenschafft vnd die lehenschafft des hoffs vnd der guter, die man nempt des Langen hoff, gelegen im Fryenbach² mit aller zugehord, so darzu vnd darin gehorrent, die selben guter vnd der selb hoff mit allen zugehorden von mir lehen gewesen sind vnd die selb lehenschafft ouch min recht fryes eigen gewesen ist, vnd ein halb viertel gutes vnd vngeuarlichen schmaltzes munch messes jerliches ewiges geltes vnd zinses, das ich vntz her allweg dar vs vnd da von gehebt vnd ingenomen han, vnd eines staten ewigen kouffes recht vnd redlich verkoufft vnd ze kouffen geben han den wisen wolbescheiden Vlrichen Rudger, Johansen Eberlis vnd Johansen Eggrichen pfleger vnd meister der siechen des spitales ze sant Gallen³ vnd dem selben spital zu sinen handen vmb sechs pfund pfenning je zwen gut geng haller fur einen pfenning Costentzer pfenning, die ich von den obgenempten pflegern dar vmb enpfangen han, vnd bin ir gantz bezalt vnd han si an min offen nutz bewent, vnd han ouch den selben obgenempten pflegern die vorgeschriben eigenschafft vnd lehenschafft des obgedachten hofes vnd aller der guter vnd zugehorden, so von recht ald von gewonheit darzu vnd dar in gehorent vnd vntz her je gehort hand, wie si genant ald wo si gelegen sind, besucht oder vnbesucht genemptz oder vngenemptz, vnd ouch das vorgenant halb viertel schmaltz jerlichs vnd ewiges geltz vnd zins, das ich dar vs vnd da von hat vnd jerlich genossen han, vnd alle die recht nutz vnd zuspruch, die ich zu dem allem bis her je han gehebt, den obgenempten spitals pflegern vnd meistern zu desselben spitals handen vff offner des riches strass fur recht fryes eigen von minen handen vffgeben vnd gefertgot ze den ziten an den stetten vnd mit allen den worten werchen vnd getaten, wie recht sitten vnd gewonheit wz, das es nach dem rechtem wol krafft vnd macht haben sol vnd mag jetz vnd hernach. Vnd dar vmb han ich mich an offner richs strass von miner hand zu des vorgenanten spitals handen vnd siner pfleger, wer die sind ald werdent, frilich vnd willenklich enzigen, wie recht sitt vnd gewonlich wz, das es krafft hat nu vnd hernach, vnd verzich mich mit disem brief gar vnd gentzlich fur mich vnd min erben vnd nachkomen aller eigenschafft aller lehenschafft aller manschafft aller kuntschafft aller rechtung aller gewer lut vnd brief aller recht vordrung vnd ansprach geistlichs vnd weltlichs gerichtz, so ich ald min erben zu der vorgenanten eigenschafft vnd lehenschafft des obgedachten hoffs vnd guter vnd aller ir zugehord vnd ouch zu dem egeschriben halben viertel schmaltz jerlichs vnd ewigs geltz vnd zins vsser den selben gutern von lehens ald von eigens wegen oder von deheinerley zuspruch wegen vntz her je gehebt hand ald hie nach jemer gewinnen mochtin, vnd das ich noch min erben noch nieman von vnser wegen des egeschriben hoffs vnd guter vnd des obgedachten halben viertel schmaltz jerlichs zins von den selben gutern nu hinnenhin niemer me sollent noch wellent ansprechen vfftriben bekumbren bekrenken noch dar an nit sumen noch irren in dehein wis weder mit geistlichem noch weltlichem gericht noch ân recht noch mit deheinen andren sachen an alle geuerd. Ich han ouch gelobt mit miner truw vnd loben mit disem brieff fur mich vnd min erben vnd nachkomen, der vorgeschriben lehenschafft vnd eigenschafft des obgedachten hoffes vnd der guter mit aller zugehord vnd des halben viertel schmaltz geltz jerlichs zins vnd dis kouffes fur fryes eigen recht wer ze sin nach lantzrecht vnd den vorgeschriben spital vnd sin pfleger, wer die sind ald werdent, an allen iren schaden dar vmb ze versprechen vnd ze verstan vff gaistlichem vnd weltlichem gericht vnd an allen stetten vnd gen aller mengklichem, wenn wo vnd wie dik si des nach dem rechten notdurfftig sind oder darvmb angesprochen geschadgot oder vffgetriben werdent, an alle geuerd. Vnd des ze warem vrkund vnd stater sicherheit aller vorgeschriben ding vnd geding han ich der vorgenant Eglolff von Altstetten der elter min insigel fur mich vnd min erben offenlich gehenkt an disen brieff. Der geben ward ze sant Gallen in dem jar, do man zalt von gotz geburt drutzehenhundert vnd nuntzig jar, dar nach in dem sexten jar, an sant Katherinen abent.