Wir Leupolt von gots gnaden hertzog ze Osterreich ze Steyr ze Kernden vnd ze Krain graue ze Tyrol¹ etc. L tun kunt fur vnser liebe bruder vnsern vettern vns vnd vnser erben, daz wir gemainklich vnd vnuerschidenlich L schuldig sein vnd gelten sullen dem edeln vnserm lieben oheim graf Tonaten von Toggenburg² vnd sinen L erben drew tausent phunt guter vnd genemer haller, die er vns zu vnsrer redlichen notdurfften bar gelihen vnd zu vnser betzalung, als wir die grafschaft Sangans³ verphendet haben, nutzleich geantwurt hat. Vnd fur dieselben drew tausent phunt haller haben wir im vnd seinen erben ze rechtem werndem phande ingeben vnd versetzt ingeben vnd versetzen auch wissentlich mit chraft ditz gegenwurtigen briefs vnser vest Starkenstain in sand Johanner tal⁴ mit luten mit gutern vnd mit allen eren rechten gewonheiten vnd zugehorden, als wir das von den edeln vnsern lieben oheimen graf Rudolfen vnd graf Hainreichen von Werdemberg⁵ verphendet haben nach laut des phandbriefs, den wir darumb besigelt innhaben, also daz er vnd sein erben dieselben vesten Starkenstain mit aller zugehorung von vns in aines werenden phandes weis innhaben nutzen vnd niessen sullent an abslag der nutz alle die weil vnd als lang, vntz daz wir in die obgenanten drew tausent phunt haller gentzlich betzalen vnd widergeben, an geuerde. Er vnd sein erben sullent auch die lut vnd guter, so zu derselben veste Starkenstain gehorent, vnwustlich innhaben vnd sich der gewonleichen sturen vnd zinsen benugen lassen vnd vns auch dieselben veste getrewlich besorgen vnd offen haben zu aller vnserr notdurft, doch an irn merklichen schaden vngeuerlich. Sy sullent auch vns der losung statt tun vnd gehorsam sein, wenn wir der von in begern vnd sy der mit drew tausent phunt hallern ermanen vnd anuordern. Wir beheben vns auch von den obgenanten luten vor dinst zu raisen vnd zu zugen, wenn vns des durfft beschicht, als ander vnser lut vns damit gehorsam sind, vngeuerlich. Mit vrkund ditz briefs. Geben ze Einzesheim⁶ an zinstag vor sand Andres tag des heyligen zwelfbotten nach Krists geburde drewtzehen hundert jar, darnach in dem sechs vnd newntzegistem jare.