Wir^a) frow Clement grafenn von Tokkenburg¹ wilent her Hainrichs salgen herren ze Hewen² elichi wirtenn, L Peter vnd Wolfram herren ze Hewen³ ir sun veriehen vnd tunt kunt allermenglichem mit disem L brief, daz wir alli dru gemainlich wissentklich vnd wolbedaht fur vns vnd fur alle vnser L erben redlich vnd recht verkoft haben die erbern frowen Margrethen Albrechts im Hof elich tohter Rudi Nuwillers von Rotahusen⁴ elich frowen mit lib vnd mit gut vnd mit aller zugehord, die vnser recht aigen waz, vnd haben die ains vngeuarlichen ewigen koffes ze koffent geben dem erbern gaistlichen herren abt Johansen des gotzhus ze Vischinan⁵ vnd sinen nachkomen zu desselben gotzhus handen, dieselben frowen er vns och gantzlich nach vnserm nutz vnd willen bezalt hat, vnd haben dieselben frowen mit lib vnd gut vffgeben vnd zu des obgenanten gotzhus ze Vischinan handen vnd gewalt bracht vnd geuertgot, alz recht sitt vnd gewonlich waz, vnd haben vns hier vber an derselben frowen mit lib vnd gut vnd mit aller zugehord fur vns vnd fur alle vnser erben ledklich vnd frilich verzigen aller aigenschaft aller lehenschaft aller dienst vall vnd gelazz alles rechten aller rechtung vordrung vnd ansprach, so wir oder vnser erben zu derselben frowen ie gehatten oder hie nach in dehain wis gehaben mohtent, an geuard. Wir sollent vnd gelobent och mit disem brief fur vns vnd alle vnser nachkomen vnd erben, derselben frowen fur aigen vnd dis kofs des obgenanten abt Johansen vnd siner nachkomen vnd des egenanten gotzhus ze Vischinan gen allermenglichem allenthalben recht weren ze sint nach dem rechten vnd nach des landes sitten vnd gewonhait an geuard. Vnd des alles ze warem offem vrkund vnd staten sicherhait so haben wir allu dru vnsri insigel fur vns vnd vnser erben offenlich gehenkt an disen brief. Der geben ist an dem nachsten dunstag vor sant Niclaus tag, do man zalt von Cristi geburt druzehenhundert vnd nuntzig iar, dar nach in dem sechsten jar.