Wir^a) die nach genempten Haintz vnd Mark die Wetzel vnd Hans Rudrer tunt kund vnd veriehent offenlich mit L vrkund diss briefs, das wir mit wolbedachtem sinne vnd mut fur vns vnd vnser aller erben recht vnd redlich L verkoft vnd ze koffen geben habind dem erbern knecht Waltin Tufel von Amptz¹ vnd sinen erben vnser mad, das man L nempt das Alber mad², das gelegen ist ob Diepoltzôwe³ vnd ainhalb stosset an die Râss² greben vnd andert halb an die fach waid vnd ze der dritten sit an die Farn meder⁴, vmb sechss pfunt Costentzer pfenning, der selben pfenning wir och von im gantzlich vnd gar betzalt vnd gewert sint nach allem vnserm willen, vnd habind im och das selb vorgeschriben mad da fur geben fur recht frigss aigen vnd och allso, das sin elichi husfrowe Margreta Tuflin das selb vorgeschriben mad nach ir elichen mans Waltis Tufels tôd inne haben niesen besetzen vnd entsetzen sol vnd mag, alle die wile vnd si lebt vnd in lib ist, vnd wenne si von tôdtz wegen ab gât, denn sol das vorgeschriben mad mit allen rechten vnd zu gehorde wider fallen ân alle sumnust vnd ierung an Waltis Tufels erben vnd denen gantzlich vnd gar ân alle zuspruch ledig vnd los sin. Wir die vorgenempten Haintz vnd Mark die Wetzel vnd Hans Rudrer vnd vnser aller dryger erben vnd nachkomen nach nieman andra an vnser statt nach von vnser wegen sullend och kain ansprach nach zuspruch zu dem vorgeschriben mad^b) niemer me nit haben weder von aigenschaft nach von lehens wegen nach von kainerlayge ander sache wegen vnd och den vorgenempten Waltin Tufel nach sin erben, wenne er enist, vnd die egenempta sin elichen husfrowen Margretun an dem selben mad niemer me sûmen nach ieren sond nach su darumb ansprechen bekrenken nach in dekain wise bekumeran weder vff gaistlichem nach vff weltlichem gericht, vnd sullend wir vnd vnser erben, ob wir nit warint, des koffes des vorgenempten Waltis Tufels vnd siner erben, ob er enwar, allso recht wern sin nach landtz recht vnd su darumb versprechen vnd verstan nach dem rechten gen manlichem ân allen schaden, wenne wo vnd wie dike su darumb an gesprochen oder vf getriben werdent mit dem rechten, vnd habind im och darumb alle dry gelobt mit vnsren truwen fur vns vnd vnser erben an aines rechten geswornen aides statt. Vnd des ze vrkund der warhait vnd stater guter sicherhait stat vnd wâr allso ze blibent ietz vnd och hie nach so habind wir die vorgenempten Haintz vnd Mark die Wetzel vnd Hans Rudrer mit ernstlicher bete erbeten den fromen vesten ritter vnsern gnadigen herren herr Vlrich von Amptz⁵ den eltern, das der sin insigel fur vns vnd vnser aller erben gehenkt hât an disen brief, wan wir aigner insigel nit habind. Ich Vlrich von Amptz ritter der elter vergich offenlich mit disem brief, das ich von ernstlicher bete wegen miner mann Haintzen vnd Marken der Wetzel gebruder vnd Hansen Rudrers min aigen insigel fur su vnd iro erben offenlich gehenkt han an disen brief mir vnd minen erben gantzlich ân schaden. Ich vergich och, das diser koffe mit minem guten willen vnd gunst geschehen ist. Dire brief ist geben ze Amptz an dem nahsten mantag vor dem tag Conversio sancti Pauli in dem jar, do von Cristus geburt warend druzehenhundert vnd in dem siben vnd nuntzigosten jâre.