Allen^a), die disen brief sechent oder horent lesen, kunden wir der burgermeister der nachgeschriben rat vnd die zunftmeister der statt Zurich, das Vlrich Mulber L der wirt vnser burger sin juchert reben ze Meilan¹ in dem Veld² gelegen stoss(et) obnan an der armen veltsiechen luten gut ze Rapreswil an der Flu³, nidnan an die L strass, einhalb an der closter frowen gut ze Switz⁴ in der samug vnd anderhalb an Wurmspacher⁵ gut mit steg mit weg vnd mit allem recht, so darzu gehort, fur L ledig frii eigen ze koffen geben hat swester Anastasiien Schaflinen, swester Margrethen Zollerin vnd swester Angnesa von Gruningen⁶ vmb sechtzig vnd sechs pfund gewonlicher Zuricher pfenig, des selben geltes der egenant Mulber von den obgenanten frowan nach siner vergicht gar vnd gentzlich gewert ist, vnd ist diser koff beschehen mit solichem geding, dz die vorgenanten frowen all drij, die wile ir deheine lebet, die vorgeschribnen juchert reben in lipdinges wise haben vnd niessen besetzen vnd entsetzen sullent vnd mugent vntz an ir aller drijer tod vnd sullent och die selben reben je von einer an die andern vallen von menlichem vnbekumbert, vnd wann die selben frowen all drij abgestorben vnd von diser welt gescheiden sint, so sollent dann die egeschriben reben ledig vnd los vallen an die erbern gaistlichen frowen die eptischin vnd an den conuent gemeinlich des gotzhus ze Wurmspach, die vnd ir nachkomen dann nach der vorgenanten drijer frowen tod die vorgeschriben juchert reben mit allem recht, so dar zu gehort, fur ir eigenlich gut niessen besetzen vnd entsetzen mugent, wie es inen fuget och von menlichem vnbekumbert an all geuerd. Es hat och der obgenant Vlr. Mulber fur sich vnd sin erben mit guten truwen gelopt, der vorgeschriben juchert reben mit allem recht, so dar zu gehort, wer ze sin nach recht der obgenanten frowen der eptischin vnd des conuentes gemeinlich des gotzhus ze Wurms­pach vnd aller ir nachkomen fur ir ledig frij eigen vor geistlichen vnd vor weltlichen gerichten vnd mit namen an allen stetten, wo vnd wenn si des notdurftig sint an all geuerd. Sich hat och der obgenant Vlr. Mulber gar vnd gantzlich entzigen alles rechten vordrung vnd ansprach, so er oder sin erben nach der vorgeschriben juchert reben mit allem recht, so dar zu gehort dehein wise iemer gewinnen mochtin gen dien obgenanten frowen der eptischin vnd dem conuent gemeinlich des vorgenanten gotzhus ze Wurmspach oder gen iren nachkomen mit geistlichen oder mit weltlichen gerichten ald mit deheinen andern sachen an all geuerd. Her uber ze einem offennen vrkund, won wir dis horten vnd sahen, so haben wir vnser statt insigel offenlich gehenket an disen brief. Der geben ist an dem nechsten samstag nach sant Andres tag des heilgen zwelfbotten, do man zalt von Cristus geburt druzehenhundert nuntzig vnd siben jar. Vnser des rat namen sint Hartman Rordorf, Panthleon ab Inkenberg⁷, Jacob Bletscher, Rudolf Meijer von Knonôw⁸, Rudolf Netstaler, Rudolf Kilchmatter, Jacob Glenter, Johans Hert, Johans Hagnower, Arnold Smit von Jonen⁹, Vlr. Tunnbrun, Johans Keller von Schwamendingen¹⁰ vnd Heinrich Obrest, der zunftmeister namen sint Conr. Tascher, Johans Stuky, Vlr. Smit von Rumlang¹¹, Rudolf Sigrist der jung, Johans von Ruty, Berchtold Stuky, Johans Muller, Cunr. Fuger, Heinr. Lowli, Jost Vischer, Rudolf Trinkler, Walther Buchnegger vnd Conr. Huber.