Allen den etc. kunden wir die nachgeschriben stette die rate vnd die burger gemeinlich der selben stette, des ersten die statt Lindowe¹, die statt Rafenspurg², die statt Memmingen³, die statt Kempten⁴, die statt Luttkilch⁵, die statt Wangen⁶, die statt Isne⁷, die statt sant Gallen, die statt Vberlingen⁸ vnd die statt Buchorn⁹ vnd vergehent offenlich mit disem gegenwertigen briefe von der ansprach missehellunge vnd zuspruche wegen, so die fromen wisen vnd fursichtigen erbern lute der statt ze Basel ze vns ze vordern vnd ze sprechende gehept hand von des angriffs wegen, als der fromme veste ritter her Marquart von Amptz¹⁰ den selben von Basel ir gut genomen vnd entwert hat, der aber vnser der vorgenanten von Lindowe burger ist, von der selben ansprach vnd missehellunge wegen vnser der vorgenanten stette aller botten mit vnserm vollen gewalt ze Baden¹¹ gesin sind ze einem fruntlichen tage vmb alle vor vnd nachgeschriben stucke. Ouch hand die fromen wisen vnd fursichtigen stette vnd burger ir bottschaft da by ze dem selben tage gehebt, des ersten die von Straszburg iren alten ammanmeister Johans Heilman, aber die von Bern von Zurich vnd die von Solottere¹² ouch ir erbern bottschaft von bette wegen vnser vnd der von Basel, vnd hand ouch die selben botten vnser beider teil sach missehellunge vnd ansprach fruntlich vnd lieplich vbereinbracht vnd vns beideteil mit wissenthafter tadinge vericht vnd gentzlich verslicht vmb die vorgenant sach in der wise vnd mit semlichen gedingen, als hienach geschriben. Des ersten so sollend wir die vorgenanten zehen stette den vorgeschriben von Basel zwey thusent oder zweintzig hundert guter gulden vsrichten vnd betzalen vff den nechsten sant Martins tag, so schierst kunftig wirt, fur den namen vnd schaden, so der obgenant von Emptz inen genomen vnd getan hat, vnd sont ouch ynen darumb besorgnisz vnd einen guten brieff geben, der mit vnser der egenanten zehen stette aller insigel besigelt ist, damite sie wol besorgt vnd irs gelts sicher sind vnd da mite si ouch wol begnuget. Es ist ouch berett vnd betadinget, das die vorgenanten von Basel vnd alle die, so zu inen gehorent, vnd ouch wir vnd alle die, so zu vns gehorent, wir beide teil wol mogen zu einander in stetten vnd uff dem lande wandeln sicherlich werben, wie vns das beidenteiln fugklich ist, yetweder teil von dem andern vnd von menglichem von der sach wegen vmbekumbert. Ouch ist es berett, das yetwederteil den andern teil vnd alle die, so inen in diser sach beholffen oder beraten gesin sind, gentzlich sicher vnd von diser sach wegen ledig vnd losz sagen sollend. Vnd were, das dewederteil von der selben sach wegen jeman sin gut verbotten oder jeman in gefangnisz in eide oder in gelupte genomen hette, das sol ouch alles gentzlich tod vnd abe vnd ledig sin, es sie verbriefet oder nit, vnd sol das widerkert werden. Es ist ouch berett vnd betadinget, das der obgenant her Marquart von Emptz die vorgeschriben von Basel versorgen sol mit vrfechte von des obgenanten zugriffes wegen fur sich fur sin frund vnd fur alle sin helffere vnd fur mengelich von sinen wegen, das si furbasz von nieman von sinen wegen von des zugriffes wegen geschadiget werden vngeuerlich, vnd sol ouch darummb vrfechte vnd ein gelerten eyd offenlich ze gotte vnd ze den heiligen sweren vnd sol ouch ynen darumb sinen versigelten brieff ingeben, also das er noch nieman anders von sinen wegen vnd von der obgenanten sache wegen niemer getun sol oder schaffen getan weder heimlich noch offenlich mit gerichte noch ane gerichte oder mit dekeinen andern sachen ane alle argeliste vnd ane geuerde. Begerte ouch der obgenant von Emptz eins vrfecht briefes von den obgenanten von Basel, den sollend si im ouch geben vnder irem insigel vnd in ouch da mite besorgen, das er vnd alle sin helffer besorgt vnd von diser sache wegen sicher vnd ledig sien, vnd sollent ouch die selben von Basel vns den vorgenanten gemeinen stetten ouch ein vrfecht brief geben. Es ist ouch eigentlich berett, das vnser der obgenanten gemeinen stette botten furderlich schaffen vnd besorgen sollent, das der schulde brieff vnd die vrfecht briefe, so den von Basel von diser sache wegen zugehoren, besigelt vertigen vnd antwurten sollend gen Costentz in Hans Bonstetters hus ane alles verziehen. Hervmb ze einem offenen waren vnd steten vrkunde aller vorgeschriben dinge so haben wir der vorgenanten zehen stette botten namlich Johans Huntbisz von Rafenspurg, Cunrat Gamerschwanger von Vberlingen, Symon Amman von Kempten, Caspar Nietstein von Lindowe erbetten die bescheiden Rudolff am Felde von Costentz, Jacob Aby von Solotteren, das die ir insigel ze einer gezugnisz aller vorgeschriben dinge von der obgenanten von Basel vnd vnser bette wegen ze ende diser geschrift offenlich getrukt vff disen handbrieff. Der geben ist an sant Walpurgen tag nach Cristus geburte viertzehenhundert vnd funff jar. Hie bi diser richtung waren her Johans Heilman altammanmeister ze Strasburg, Erhart von Ratwil¹³ von Straszburg, Peter Rieder, Cunrat Horwer beide von Bern, Rudolff Stussi, Rudolff Sigrist von Zurich, Jakob Aby von Solotteren, Claus Huller, meister Hennikin von Basel vnd ander erber lute.