Wir^a Cun von gottes gnaden abt des gotzhus ze sant Gallen¹, dz an alles mittel zu gehort||
dem stul ze Rom, tund kunt vnd veriehent offenlich mit disem brief, dz fur vns kam ze Wil²||
in vnsers vorgenanten gotzhus statt der beschaidnen kneht Cunrat von Lopach, vnd gab vns da der||
selb Cunrat von Lopach fur sich vnd sin erben ledklich vff an vnser hand ain pfund pfenning guter vnd genamer Costentzer muns jarlichs vnd ewigs geltz ab vnd vsser sinem hof ze Lên, der von vns vnd vnserm vorgenanten gotzhus ze sant Gallen sin lehen sy vnd stossi ainhalb an Ranwil vnd anderthalb an Waltkilch vnd an Marshub, vnd batt vns ernstlich, das vorgenant pfund pfenning Costentzer muns ab vnd vsser dem vorgenanten hof ze Lên jarlichs vnd ewigs geltz ze lihenn dem erberen fromen Vlrichen Blaiker burger ze Bischoffzell, won och er im vnd sinen erben das selb pfund pfenning der muns, als vorgenant stat, jarlichs vnd ewigs geltz von siner nôt wegen ze koffenn geben hetti. Darvmb erhortant wir do sin bett, won sy vns redlich dunkt, vnd lihen vnd senden dem egenanten Vlrichen Blaiker burger ze Bischoffzell dz vorgenant pfund pfenning Costentzer muns jarlichs vnd ewigs geltz ab vnd vsser dem vorgenanten hof ze Lên ze lehen mit disem offenn brief, was wir im daran durch reht lihen sont vns vnd vnserm vorgenanten gotzhus an allen vnsern rehten vnd gewonhaiten vnschadlich. Dis ist beschehen vnd vollfurt, als es crafft vnd maht haben sol vnd mag ietz vnd hie nach. Vnd des ze offnem vnd warem vrkund haben wir obgenanter abt Cun vnser abtye insigel offenlich gehenkt an disen brief. Der geben ist an dem nahsten zinstag vor sant Vitz tag nach Cristi geburt vierzehenhundert jar vnd darnach in dem sibenden jare.