Gregorius etc. Venerabili fratri episcopo Constanciensi salutem etc. Sincere devocionis affectus, quem dilectus filius nobilis vir Hartmannus de Prasperp¹ miles Constanciensis diocesis ad nos et Romanam gerit ecclesiam, grata quodque et accepta servicia, que idem miles nobis et eidem ecclesie fideliter impendit et adhuc impendere non desistit, promerentur, ut ipsum condignis favoribus et graciis prosequamur. Dudum siquidem pro parte dicti militis felicis recordacionis Innocencio papa VII predecessori nostro exposito, quod licet ius percipiendi et colligendi omnes decimas provenientes ex fructibus excrescentibus infra limites parrochialis ecclesie in Martbach² cum eius filiali ecclesia in Altstetten³ dicte diocesis, que monasterio sancti Galli de sancto Gallo eidem Romane ecclesie immediate subiecto ordinis sancti Benedicti dicte diocesis canonice unita dicitur de antiqua et approbata ac hactenus pacifice observata consuetudine ad dilectos filios abbatem et conventum dicti monasterii pertineret, ipsique abbas et conventus fuissent in pacifica possessione dictarum decimarum eciam a tempore, cuius contrarii memoria non erat, tamen postea quidam laici perceptionem earundem decimarum sibi de facto usurpaverant ac fructus decimales huiusmodi, qui pro tempore provenerant infra dictos limites, perceperant et converterant in usus proprios eorundem, quodque dicti abbas et conventus ad recuperandum predictas decimas seu earum percepcionem de manibus eorundem laicorum impotentes extiterant, predicteque decime, nisi manu potenti nequibant recuperari a detentoribus eisdem, prefatus predecessor eiusdem militis, qui ut asserebat dicti monasterii vasallus existebat in ea parte supplicationibus inclinatus episcopo Constanciensi eius proprio nomine non expresso suis dedit litteris in mandatis, ut, si ita esset, dictas decimas et ius decimandi huiusmodi cum omnibus iuribus et pertinenciis suis eidem militi in feudum per eum usque ad quinquennium dumtaxat et deinde usque beneplacitum eiusdem predecessoris tenendas et possidendas auctoritate apostolica concederet, ita quod dicto beneplacito expirante seu ipso milite forsan interim decedente ius prefatum ad dictum monasterium omnino libere reverteretur, et si dictus miles post huiusmodi beneplacitum dictum ius libere non dimitteret, ipse idem predecessor ipsum maioris excommunicacionis sentenciam incurrere voluit ipso facto, a qua preterquam in mortis articulo nisi per Romanum pontificem absolvi posset, prout in ipsis litteris plenius continetur. Cum autem sicut exhibita nobis nuper pro parte dicti militis peticio continebat, licet huiusmodi littere bone memorie Marquardo episcopo Constanciensi⁴ predecessori tuo predecessore nostro tunc in humanis agente presentate fuissent ipse tamen Marquardus episcopus propter potenciam et tirannidem dictorum laicorum ut dixit ad execucionem earundem litterarum humiliter requisitus procedere recusavit, quare pro parte dicti militis nobis fuit humiliter supplicatum, ut cum eciam huiusmodi beneplacitum per dicti predecessoris nostri obitum expiraverit, predictum quinquennium ad aliud quinquennium prorogare eumque in possessionem earundem decimarum induci mandare de benignitate apostolica dignaremini. Nos igitur huiusmodi supplicacionibus inclinati fraternitati tue per apostolica scripta mandamus, quatenus, si est ita, predictas decimas, quarum fructus redditus et proventus octuaginta marcharum argenti secundum communem extimacionem valorem annuum, ut ipse miles asserit, non excedunt, ac ius decimandi huiusmodi cum omnibus iuribus et pertinenciis suis eidem militi iuxta formam et tenorem dictarum litterarum auctoritate nostra concedas sibique predictum quinquennium ad aliud quinquennium a fine eiusdem primi quinquennii computandum eadem auctoritate extendas, inducens per te vel alium seu alios eundem Hartmannum vel procuratorem suum eius nomine in corporalem possessionem decimarum iuriumque et pertinenciarum predictorum et defendens inductum amotis dictis laicis et quibuslibet aliis illicitis detentoribus ab eisdem ac faciens sibi de ipsarum decimarum fructibus redditibus proventibus iuribus et obvencionibus universis iuxta huiusmodi nostre concessionis tenorem integre responderi, contradictores per censuram etc., invocato ad hoc, si opus fuerit, auxilio brachii secularis, non obstantibus constitucionibus apostolicis et aliis contrariis quibuscumque, seu si eisdem abbati et conventui vel quibusvis aliis communiter vel divisim a dicta sit sede indultum, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mencionem. Volumus autem, quod idem miles racione dicti feudi in manibus venerabilis fratris nostri Antonii episcopi Bononiensis⁵ camerarii nostri extunc prestet in forma consueta fidelitatis debite iuramentum. Datum Rome apud sanctum Petrum decimo kl. iulii anno primo. A.XXII. Corario.