Ich^a Elisabeth Schniderin Melchiors Schniders saligen wilunt elichi wirtinn burgerin ze sant Gallen vnd wir nachgenanten iri elichi kind Claus, Gallus, Melchior,||
Adelhait, Nes vnd Wibrat bekennen offenlich mit disem brief fur vns fur vnser erben vnd nachkomen, das wir mit rât vnser getruwen frunden von vnser||
redlicher kumberhaffti wegen aines iemerwerenden staten kôffes verkofft haben drissig schilling pfenning alles guter vnd genamer vngeforlicher Cost(entze^r munsse||
jarlichs ewigs zinses gelegen in margtzreht ab vnd vsser grund grât gemur gezimberren hofstatt hofraiti vnd allen rehten zinsen nutzen vnd zugehorden vnsers halben tailes vnd vnsrer rehten des huses hofstatt vnd hofraiti gelegen ze sant Gallen in der statt an dem margt enzwischen Hug Zilis vnd Hans Wulliwebers saligen husern, vnd haben dieselben drissig schilling pfenning jarlichs zinses in margtzreht aines staten ewigen koffes ze koffenn gegeben vnd och gefertget, als reht ist, dem wolbeschaidnen Hermann Mettmenegger burger ze sant Gallen vnd sinen erben, ob er enwer, vnd haben darvmb vnd da fur von im enpfangen vnd an vnsern offnen nutz bewendet drissig pfund guter Cost(entze^r pfenning. Hervmb sond och bi guten truwen, das ist namlich beredt verhaissen vnd bedinget, wir alli sibni gemainlich vnd vnuerschaidenlich vnd vnser erben vnd nachkomen, in dero hand vnd gewalt vnser halber tail vnd vnsri reht des vorgeschriben huses ietz sind ald iemer koment, demselben Hermann Mettmenegger vnd sinen erben vnd nachkomen ietz vff sant Gallen tag, der schierest kumt nach datum diss briefs, vnd dannenhin immer ewenklich alli jâr ie vff sant Gallen tag ân allen iro schaden vnd ân alle widerred infall vnd vszug ze iro handen bezalen ze sant Gallen in der statt drissig schilling pfenning guter vngeforlicher Cost(entze^r munsse ald anderlay ie danne ze sant Gallen guter genger munsse, souil geltes wol wert da fur, ald welhes jares das niht beschah, so mugent derselb Herman Mettmenegger sin erben vnd nachkomen ie nach sant Gallen tag, wenn si wellent, vns vnser erben vnd nachkomen erfordren vftriben vnd schadgen vnd vnsern halben tail vnd vnsri reht des vorgeseiten huses mit sinen zugehorden angriffen vnd verkoffen ze sant Gallen an offner gant nach der statt vnd nach sogtaner zinse reht sitt vnd gewonhait vmb den zins, der inen ie danne gefallen vnd niht worden ist, vnd vmb allen schaden, in den sie ienannt da von sind komen. Wir haben och gelobt vnd lobent mit disem brief alli sibni gemainlich vnd vnuerschaidenlich fur vns vnd vnser erben, der vorgenanten drissig schilling pfenning jarlichs zinses gelegen in margtzreht ab vnd vsser vnserm halben tail vnd vnsren rehten des egeseiten huses vnd och diss koffes reht weren ze sinne nach der statt ze sant Gallen reht vnd gewonhait âne geuerd. Derselb Herman Mettmenegger hat vns och die gnad vnd furdrung getân fur sich fur sin erben vnd nachkomen, das wir obgenanten sibni alli gemainlich ald welhes vnder vns ist den vorgenanten jarlichen zins wider ab koffen mugent, welhes jares vns das wol fuget, es sig vber kurtz ald vber lang, mit drissig pfund pfennigen guter Cost(entze^r munsse ald mit anderlay ie danne ze s[an]t^b Gallen guter genger munsse souil gelts wol wert, doch mit namen vor sant Johans tag des Toffers ze sunnwendi, der denne desselben jares ist, mit dem zinse, vnd nach sant Johans tag ân den zinse desselben jares. Des alles ze offem vrkund haben wir alli sibni erbetten vnser lieben vettern vnd frunde Hans Schnider vnd Hainrich Huxen baid burger ze sant Gallen, das sv iri aigni insigel fur vns fur vnser erben vnd nachkomen gehenkt hand an disen brief, inen selber vnd iren erben vnschadlich, ob sv vnser erben nit werdent. Geben ze sant Gallen an sant Peters abent im brâchet, do man zalt von gottes geburt tusent vierhundert vnd siben jare.