Ich^a Jacob der Maiger vnd ich Jos der Nukomen burger ze Lindow¹ vnd ich Vlrich||
der Nukomen burger ze Memingen² tund kunt vnd veriehin offenlich fur vns||
vnd fur vnser erben mit disem brief allen, die in ansehent oder horent lesen,||
von dez zuspruchs wegen, alz wir gehebt haben zu den erbern wisen dem amman vnd dem rate vnd zu der gemainen stat ze Rinegg³ von der dryer vass wegen mit saltz, die vns vf dem Se⁴ genomen vnd gen Rinegg in gefurt wurden, darumb hat vns der wise wolbeschaiden Heinrich der Sidler vogt ze Fuzzach⁵ lieplich vnd fruntlich gen enander verricht vnd schlecht gemachot gentzlich vnd gar, vnd och also, dz vns von dez selben nomms wegen bekert vnd gnug geschehen ist, vnd ze beider sit vnd wer von ietweders tails wegen darzu gehaft ist, darumb enrrander gut frunde sin sullen vnd dz furbaz niemerme geafern noch ge[re]chen^b sullen noch wellen in dehain wise, vnd och mit namen, dz wir noch vnser erben noch nieman ander von vnsern wegen dieselben von Rinegg noch ir stat noch nieman andern, wer darzu gewant oder gehaft gewesen ist, furbas niemerme bekumbern bekrenken noch angesprechen sullen noch wellen weder mit gaistlichem noch mit weltlichem gericht noch âne gericht noch in dehain wise noch von dehains rechten noch vfzugs wegen. Vnd dez allez ze offem vnd warem vrkund vnd vester sicherhait geben wir fur vns vnd fur vnser erben den vorgenanten dem amman vnd dem rate vnd der gemainen stat ze Rinegg vnd wer darzu gehaft ist disen brief daruber geuestnot vnd besigelt ich obgenanter Jacob der Maiger mit minem aigenn angehenkten insigel. So haben wir obgen(anteⁿ Jos vnd Vlrich die Nukomen gebruder vns vnd alle vnser erben dez verbunden vnder dez ersamen manns insigel Kaspar Nietstains dez statammans ze Lindow⁶, dz er [o]ch^b von vnser bet wegen, won wir aigner insigel nit haben, offenlich gehenkt hat an disen brief, doch im selb âne schaden. Der geben ward ze Lindow an dem nechsten donrstag nach sant Johans tag ze sunwenden nach Cristi geburt vierzehenhundert iar vnd darnach in dem sibenden iar.