Wir^a abt Rudolf von gottes genaden abt zu sant Johann¹ im Turtal gelegen sant Benedictus ordens in Costenzer||
bistum gelegen vnd das capitel gemeinlich tun kunt allermenlich vnd veriechen offenlich mit disem brief allen dien, die||
inn ansechent oder horend lesen, das wir mit rat vnd wolbachtem mut vnd durch nutz willen vnsers gotzhus verlichen||
hand zu einem rechten erblechen die akker, die vormals gehort hand zu der widm, dem erbern knecht Vlrich Schwendibul vnd sinen erben, die gelegen sint an dem Grutveld², stossent einhalb an den weg vnd andrent an die wingarten vnd an den Buben hof³ vnd an die andren wis. Item es ist ze wissen mit disem brief, das her Vlrich Bollinger^b vormals vnser kilchherr zu der alten Rappreswil⁴ bi sinen zitten verlichen hat^c mit willen vnd mit rat vnsers herren des abtz vnd couentz gemeinlich vnd durch nutz willen vnsers gotzhus den obren akker zu einem rechten erblechen Vlrich Schwendibul vmb ein mut kern jerlichs geltz oder vmb XIIII ß. dn. gewonlicher Zuricher muntz, weders Vlrich Schwendibul wel oder sin erben. Ich her Hans Keller, den man nempt Gasser, vergich allermenlich mit disem brief, das ich Vlin Schwendibul verlichen han zu einem rechten erblechen die vndren akker vmb I mut kern jerlichs geltz oder vmb XIIII ß. den. Gewonlicher Zuricher muntz, vnd han dz getan mit gunst willen vnd rat mins herren^d des abtz vnd des couentz gemeinlich vnd durch nutz willen vnsers gotzhus, vnd zu dien^e vorgenanten akkern vnd stukken hat vns Vlrich Swendibul ein gut zu gebunden, dz nempt man Vnderwingarten, das an die vorgenanten akker stosset, vnd das selb gut hat Vlrich Swendibul vns geben zu einem rechten redlichen inbund. Vnd dar vmb zu einer zugnuss vnd merer sicherheit aller vorgeschribner ding, das das war vnd stet belib, so hant wir abt Rudolf vnser eigen insigel offenlich gehenkt an disen brief. Wir der couent gemeinlich hant och vnser eigen insigel offenlich gehenkt an disen brief. Der geben ist an dem nechsten samtag vor sant Jacobs tag nach Cristus geburt vierzehen hundert jar vnd in dem sibenden jar.