Wir^a Ruprecht von gots gnaden Romischer kunig zu allen ziten merer des richs enbieten den burgermeistern||
rate vnd burgern gemeinlichen vnser vnd des heiligen richs stad zu sant Gallen vnser gnade vnd allez||
gut. Lieben getruwen, vmbe soliche gewonlich sture, so ir vns vnd dem riche jerliche pflichtig sint czu||
geben vnd fallende ist uff sant Martins tag des heiligen bisschoffs, da heiszen vnd enpfelhen wir uch ernstlichen, das ir dieselben sture, die ir vns von des richs wegen uff disen nechsten vergangen sant Martins tag verfallen sint, richtent vnd gebent dem erwirdigen Rabann bisschoff zu Spire³ vnserm fursten cantzler vnd lieben getruwen, vnd wann ir daz getan habent, so sagen wir uch derselben sture von demselben vergangen sant Martins tag von vnsern vnd des richs wegen mit disem briefe quijt vnd lovs. Zu vrkund versigelt mit vnser kuniglicher maiestad anhangendem ingesigel. Datum Altzey⁴ anno domini millesimo quadringentesimo septimo, ipsa die beate Lucie virginis, regni vero nostri anno octavo.