Lieben^a getruwen, vns hant vnsere lieben getruwen burgermeister vnd rat vnser vnd des heiligen richs||
stat Schaffhusen¹ furbracht, wie das graff Friderich von Tockenburg² einem yrem mitburger||
sechshundert guldin wert oder mer an kauffmanschafft genomen habe, so habe der Geszler³ einen||
von Schaffhusen gefangen vnd halte den auch noch inne gefengnisze, darumbe auch die von Schaffhusen vch geschriben vnd gebedten haben, diewile der von Tockenburg vnd auch der Geszler uwer burgere sin, das yr dann mit yn woltent schaffen, das sie die vorgenanten name wiedergeben vnd kerten, so wolten sie yn des rechten fur uch gehorsam sin, das yr von yn verslagen habent vnd nit vffnemen woltent, das vns doch fremde von uch nyemet, darzu hant vns auch die vorgenanten von Schaffhusen ertzelet, sy wollen vch vnd den uwern des rechten noch gerner gehorsam sin vor vnserm hoffgerichte zu Rotwile⁴ oder vor den von Vlme oder vor den von Basil oder vor den von Costentze, ob yr an sie icht zu sprechen habent. Vnd herumb so begern wir mit ernste, das yr die obgenanten den von Tockenburg vnd den Geszler uwere mitburger daran wisent vnd darzu haltent, das sie den von Schaffhusen wiedergeben vnd keren, was sie yn genomen hant, vnd auch die gefangen ledig sagen vnd sich gein yn mit recht genugen laszen, als vorgeschriben stet. Wo ir des nit tetent, des wir doch nit meynen, so musten wir den von Schaffhusen gonnen, uch darumbe an vnserm hoffgerichte zu Rotwile anzulangen vnd sich daselbs des rechten von vch zubekomen, vnd begern heroff uwer beschr. antwort mit dieszem bodten. Datum Constantie feria tertia post dominicam Oculi anno domini MCCCCVIIIo regni vero nostri anno VIIIo. Ad mandatum domini regis Johannes Winheim⁵.