Ich maister Hainrich Koch der zit wesenlich zu Mayenfeld¹ bekenn allermenigklich mit dem brieffe, wie das mir der edel vnnd wolgeborenn herr her Friderich vonn Toggenburg² graff ze Brettegow³ ze Tauas⁴ zu ainem stattenn eewigenn erblechenn hus stadel vnnd hoffraitte gelegenn ze Mayenfeld in der stat gelichenn vnnd verlichenn nach inhalt aines besiglottenn lechenn brieffs, so ich von sinen gnadenn empfangenn hab, weliches hus stadel vnnd hoffraitte stost zu ainer sitt an der Mairyenn stadel hinnen an des Weggenn stadel zu zway sittenn an dye gemainen straß, das selbig hus mit grund grât etc. mit dem geding, das ich ob genanter Hainrich Koch vnnd min erbenn dem ob gemeltenn lechenns herrnn vnnd sinen nachkomen ewigklich vnnd jarlich vnnd iegklichs jars besunder ze rechtem zins richten vnd gebenn sondt zechenn schillig pfenning Costentzer muntz oder ander muntz, so vil die dann ze Chur in der stat gut vnnd genam sindt ze nemenn fur so vil geltz one geuardt, jarlich vff sannt Andras tag one als on all gefart, also mit dem geding, weliches jares ich ob genantter Hainrich Koch min erbenn vnnd nachkomenn vermeltem lechens herrenn siner gnadenn erbenn vnnd nachkomen denn vorgedachtenn zins die zechenn schillig pfennig nit richtindt vff das vorgedacht zil vnnd tag, so ist mit geding das vorgedacht hus stadel vnnd hoffraitte mit allen zu gehordenn vorgenanttem graff Friderich vonn Toggenburg vnnd sinen erben zinsfellig wordenn vnnd gen hoff gefallenn mit dem zins des selben jars on alle widerred. Ich ob geruorter Hainrich Koch vnnd min erbenn hondt ouch vollenn gewalt vnnd gut recht, mine recht an dem vor gedachtenn erblechenn ze versetzenn vnnd verkouffenn, wan ich ald min erbenn des notturfftig sind, doch gedachtem lechens herren an sinen zinssenn vnnd lechens rechtenn one schadenn. Vmb solichs alles vorgeschribner lechenns herr mir vnnd minen erbenn vnnd nachkomen genugsamj werschafft gethonn hat min ob gemelter lechens brieff klarlich vßwist vnd meldet. Des datum wist in dem jar, do man zalt von der gepurt Cristj vierzechenn hundert jar, darnach inn dem achdoden jare, am sambstag vor mit vastenn.