Wir Ruprecht etc. bekennen etc., als vormals der edel graff Wilhelm von Bregentze¹ vnser vnd dez richs lieber getruwer vnd die ritterschafft gemeinlichen vnserr kuniglichen maiestat mit clage furbracht hant, wie daz die burgermeistere der rate vnd die burgere gemeinlichen vnser vnd dez heiligen richs stad Lyndauwe² den Appentzellern³ vnd den, die sich zu yn verbunden hant, wider sie beholffen weren vnd den mit koste vnd spisunge hulffe vnd zulegunge deten vnd wir darumb den vorgenanten burgermeistern vnd rate zu Lyndaw etwe dicke geschr(ibeⁿ vnd yn ernstlich gebotten haben, den Appentzellern vnd den, die sich zu in verbunden hant, deheynerley hulffe bystand oder zulegunge zu tun in dehein wise, vnd sie daruber den vorgenanten Appentzellern vnd den, die sich zu yn verbunden hant, spise vnd koste haben laszen zufuren vnd damit wider vns getan, des haben wir vmmb dez willen, daz sie vns vnd allen den, die uff vnserme teyle des krieges wider die Appentzeller sint, wieder dieselben Appentzeller vnd die, die sich zu yn verbunden hant, furbaz, als lange der krieg weret, getruwlich beholffen sin vnd sie auch nit spisen eszen noch trencken noch deheinerley koste zugen laszen sollent in deheine wise, sunder daz weren vnd dauor sin, als verre sie mogent, ane alle geuerde, als sie vns daz alles eigenlich versprochen globt vnd zu den heiligen gesworn hant, vff die vorgenanten burgermeistere rate vnd burger gemeinlich zu Lyndaw als von der egenanten sache vnd geschicht wegen luterlich vnd gentzlich vertziegen vnd sie wieder zu vnsern gnaden vnd hulden genommen verzihen daruff vnd nemen sie zu vnsern gnaden vnd hulden in crafft disz brieffes vnd wollen auch, daz furbaz nymand, er sy wer er sij, den vorgenanten burgermeistern rate vnd burgern zu Lyndaw von der vorgenanten sache vnd geschichte wegen deheinerley vngunste oder argen willen bewisen in deheine wise, als liebe eyme iglichen vnser hulde sij vnd vnser vnd dez heiligen richs swere vngnade zuuermyden. Ork. etc. Geben zu Costentz nach Crists geburte XIIIIc vnd acht jare, am nehsten mantag nach dem sontag, alz man in der heiligen kirchen singet Letare, vnsers riches in dem achten jare.