Wir^a Ruprecht von gots gnaden Romischer kunig zu allen ziten merer des richs bekennen vnd tun kunt offenbar mit diesem brieff allen den, die yn sehent||
oder horent lesen, das wir haben angesehen getruwe vnd danckneme dinste, dy die burgermeistere der rate vnd die burgere gemeinliche der stat tzu||
Costentz vnser vnd des richs lieben getruwen vns vnd dem heiligen riche williclich ertzeuget vnd bewiset hant, nemlichen mit solicher vestikeit, als sie vns||
vnd dem heiligen riche zu eren vnd dem adel vnd der gemeyn ritterschafft zu hulfe den Appentzellern³ vnd yren eidgenoszen, die sich zu yn verbunden hatten, vnd fursten grauen herren rittere vnd knechte stiffte clostere vnd geistliche lute vnderstunden von yren lannden luten vnd gutern zudringen vnd zuvertriben, so versteclich vnd so herteclich wiederstanden sint, vnd vmb des willen, das wir sie vns vnd dem heiligen riche hinuor zu dienen desta williger vnd bereiter finden vnd haben mogen vnd das sie auch sehen vnd befinden, das wir soliche truwe vnd dinste gein yn nit vnbedacht wollen laszen, so haben wir den obgenanten von Costentze von vnsern besundern gnaden vff den zolle off vnd vnder der rinbrucken zu Costentz, der in vormals von vnsern vorfarn an dem riche Romischen kreiszern vnd kunigen vor zweitusent gulden versetzt vnd verpfendet worden ist, darzu tusent gulden geslagen, also das der selbe zolle den vorgenanten von Costentze hinfur drutusent gulden sten sal vnd wir vnd vnser nachkomen yn die auch, so wir den vorgenanten zolle wieder tzu vns vnd dem riche losen wollen, in einer summe geben vnd bezalen sollen, doch so wollen wir, das die vorgenanten von Costentze denselben zolle hinfur nit hoer noch anders nemen sollen dann nach vszwisunge der briefe, die yn von vnsern vorfarn an dem riche Romischen keyszern vnd kunigen furmals daruber geben worden sint. Orkund disz briefs versigelt mit vnser kuniglich maiestat anhangendem ingesigel. Geben tzu Costentze nach Cristi gepurte vierzehenhundert jare vnd darnach in dem achten jare off den sonntag Judica, vnsers richs in dem achten jare.