Wir Cun von gotz gnaden abt vnd daz cappittel gemainlich des gotzhus ze sant Gallen¹ veriehen vnd tunt kunt allermenglichem mit disem brief, alz der from vest vnsers gotzhus dienstman Rudolf von Rosenberg von Zukkenriett² von vnser bett wegen an sins vatter salgen statt vnser angult worden ist gegen dem edeln vnserm ohan Hansen von Tengen³ vnd Annen siner elichen frowen vmb zwaihundert guldin, die wir inen iarlich vff ainen widerkoff schuldig sint zegebent, daz wir da mit gemainem ainhelligem rât vnsers cappittels fur vns vnd alle vnser nachkomen gelobt vnd verhaissen haben vnd lobent ôch ietz getruwlich mit disem brief, denselben Rudolfen von Rosenberg vnd sin erben von allem schaden ze ledgent vnd ze losent, den si von dirr angultschaft vnd sach wegen in dehain wis ald weg enpfahent, ân geuard. Tatten aber wir ald vnser nachkomen daz nit also, so hett derselb Rudolf von Rosenberg vnd sin erben vnd wer inen des helfen wil allweg, wenn vnd wie dikk es also ze schulden kumpt, vollen gewalt vnd recht, vns vnd vnser nachkomen vnd vnser gotzhus dar vmb anzegriffent ze notent vnd ze pfendent an allen vnsern vnd vnsers gotzhus luten vnd gutern ligenden vnd varenden vssgenomen an vnsers gotzhus statt ze Wil⁴ allenthalben, wenn wa vnd wie si went, mit gerichten vnd ân gericht, vntz dz si dar mit allweg von der sach wegen gantzlich entschadgot werdent. Vnd sol vns noch vnser nachkomen noch vnser gotzhus noch dehain vnser [...]^a vnsers gotzhus lut noch guter vssgenomen die von Wil hie vor nit friden noch schiermen dehain recht burgerrecht frihait noch gnad noch dehain sach, so jeman ze schierm erdenken kan, wan wir vns des vnd alles schierms in dirr sach ledklich verzigen hânt alles luterlich ân geuerd. Des alles ze warem offem vrkund so haben wir vnser abty vnd cappittels insigel fur vns vnd vnser nachkomen offenlich gehenkt an disen brief. Der geben ist.