Ich Jans von Weytra purger ze Chrems vnd ich Imm sein hausvrow vnd alle vnser erben veriechen mit diesem brief vnd tven chvnt allen den, die in lesent oder horent lesen, vmb den chrieg, den wier gehabt haben gen dem erbern herren probst Dietmaren vnd gen seinem gotshaus ze Reiehersperg, vmb fvmf vnd viertzk pfenning purchrecht geltes Wienner mvnz, gelegen auf dez selben gotshauses weingarten in der Neydow vnd auf dem hof ze Chrems. Di selbn gult haben wier dem gotshaus ze Reiehersperg ledichleich verchauft vnd gegeben vmb berait pfenning, vnd ob sich der vorgenant weingart hin wider schuttet oder nicht, so haben wier noch vnser erben hinfür ewichleich an der vorgenannten gult weder von dem weingarten noch von dem hof dhain recht noch dhain vodrung mit dhainerlay ansprach nimmer mer. Wir sein auch derselbn gult dez e genannten gotshauses rechter scherm vnd gewer für all ansprach, als purchrechtes recht vnd gewonhait dez landez in Osterrich. Welchen schaden iz der vber mit recht dez scherms nam, den lubn wier im gaenczleich ab ze legen mit vnsern treuen, vnd schulln si daz habn auf vns vnd auf alle deu vnd wier haben. Vnd gebn wier dem gotzhaus ze Reichersperg diser sache zu einem sichern vrchvon disen brief versigltn mit mein vorgenantn Jansen insigel. Der gegebn ist an sand Cholmans tag nach dreuczechen hvndert jaren von Christi gepurd in dem sechs vnd viertzkistem jar.

Source Fulltext: PANGERL, Anhang Stift Hohenfurth (=FRA II/23, Wien 1865) S. 394-395