In nomine domini amen. Cum jam dudum inter prouidos viros religiosos, videlicet fratres fratrem Henricum abbatem ac conuentum sui monasterii Altiuadensis ordinis Cisterciensis, ex parte vna et discretum virum dominum Mauricium plebanum et rectorem ligittimum ecclesie in Stropnycz ipsius ecclesie nomine parte ex altera grauis esset controuersia exorta super jure percipiendi decimas agrorum et prediorum omnium parochianorum ecclesie prefate in Stropnycz, prenominato domino abbate ac conuentu suprascripti monasterii ac ordinis priuilegia de percepcione omnium decimarum tocius parrochie antedicte producentibus et allegantibus, se fuisse esse et fuisse in pacifica quasi possessione iuris perecipiendi easdem decimas a tempore, cuius contrarii memoria non existit; ipso autem domino Mauricio rectore preilicte ecclesie jus pro se et ecclesie commune allegante et dicente, predictas decimas eidem deberi sue ecclesie nomine utpote sitas infra limites ecclesie prelibate. Tandem cum diu in iudicio et extra et coram conseruatoribus iurum et priuilegiorum a sede apostolica monasterio prenotato concessis litigassent, pro bona pacis et concordie ac amicabilis composicionis in nos Petrum de Rosenberch prepositum ecclesie omnium sanctorum in Castro Pragensi et canonicum ecclesie Pragensis sponte et beniuole ex utraque parte laboribus et litis expensis parcere cupientes compromittere curauerunt, se sub pena per nos in pronunciacione appendenda obligantes. Ac deinde termino pro pronunciacione ac amicabili composicione facienda adueniente prefixo nos dei nomine inuocato in parcium presencia personali ac earundem iuribus et allegacionibus intellectis talem inter suprascriptas partes laudacionem pronunciacionem ac amicabilem composicionem fecimus, vt scilicet prenominatus abbas et eius conuentus nomine monasterii prelibatarum decimarum possessores jure percipiendi prefatas decimas utantur libere et fruantur, quemadmodum eas sine cuiusquam inpedimento consueuerunt percipere a tempore, cuius contrarii memoria non existit. Ne tamen ecclesia sepefata in Stropnycz omnino decimis, que sunt tributa egencium animarum fraudaretur, necnon penitus orbaretur, laudamus ordinamus et amicabiliter componentes statuimus arbitrando, vt sepedictus abbas vniuersos arabiles laneos eiusdem parrochie in Stropniycz secundum mensuram et quantitatem Paczouiensium laneorum faciat mensurare, et quotquot de agris solummodo arabilibus cultibilibus seu seminabilibus tempore mensuracionis inventis laneos ibidem in tota parrochia Paczouiensis quantitatis reperiet, tot mensuras in opido ipso Stropnycz consuetas de grano siliginis vnam videlicet mensuram necnon et auene de quolibet laneo vnam mensuram prefato plebano nomine ecclesie sue tribuat singulis annis perpetuis temporibus persoluat. De curiis autem seu allodiis mobilium tunc temporis existentibus, de quibus eciam predictus abbas nomine sui monasterii decimas inconcusse consueuit per longissima retroacta tempora percipere, de curia videlicet domini Johannis, qui Sprinczel dicitur, item de curia domini Luduici de Czeuetlaren, item Stephani de Crophslog, item de curia in Piberslog Nycolaii Sagitarii, item Leulini in Gedlicz, item de curia Hogerii in Seyben, item Johannis in Gutenprun, infra limites ipsius ecclesie volumus et arbitratoria auctoritate mandamus decimas vniuersas, cum collecte fuerint, per medium diuidendas, medietatemque earundem decimarum dicti abbas et conuentus nomine monasterii percipiant, alteramque medietatem plebanus recolligat memoratus. Insuper pronunciamus statuentes, ut quecunque parcium ipsarum a prescripta nostra pronunciacione resiliret ac eidem parere contempneret, alteri parti composicionem obseruare volenti quindecim sexagenas grossorum denariorum Pragensium assignaret pro pena et alias quindecim sexagenas eiusdem monete ad fabricam Pragensis ecclesie dare deberet certis super pene solucione ab alterutra parte fideiussoribus constitutis. Acta sunt autem hec in castro nostro in Crumnaw coram ydoneis testibus domino Bochdancio decano Dudlebensi, et Wenczeslao plebano de Blanycz, Dyrslao plebano de Cremsa, ad hoc specialiter invitatis in ipsarumque parcium presencia personali. In huiusque rei testimonium presentes litteras fieri iussimus nostro sigillo ac sigillis sepedicti Mauricii plebani de Stropnycz testiumque prescriptorum appensione munientes. Datum loco quo supra anno domini millesimo trecentesimo sexagesimo vltimo die mensis Decembris.

Source Fulltext: PANGERL, Stift Hohenfurth (=FRA II/23, Wien 1865) S. 118-120