In nomine domini amen. Quia omnes morimur et quasi aque, que non reuertuntur, dilabuntur, et qui semel exit, non reuertitur ad penitenciam peragendam, eapropter decet quemlibet Christianum considerare nouissima sua, ut ueniente sponso cum prudentibus mereatur ingredi uirginibus ad nupcias leticie sempiterne. Ego igitur Vlricus dictus de Drochaw sano consilio consensu et vnanimi uoluntate heredum meorum, quippe cum bona nostra mobilia et inmobilia cum dictis heredibus meis adhuc habeantur communiter indiuisa, assistente eciam ad hoc deliberacione ac uoluntate nobilium uirorum et dominorum meorum videlicet domini Petri domini Jodoci domini Vlrici domini Johannis dictorum de Rosenberch nec non omnium amicorum meorum, qui huiusmodi libenter et fauorabiliter admiserunt, ut deus uenie largitor et humane salutis auctor michi det in hoc mundo sic uiuere, ut transcursus huius mundi tenebris, ubi nichil certum habemus, dignetur perducere ad futuram, quam inquirimus ciuitatem. Do presentibus lego statuo testor et assigno ecclesie parochiali sancti Nycolay in Rosenberch et plebano pro tempore existenti perpetuis temporibus duraturum (sic) pratum adiacens Multauie sub uilla dicta Korith pro animabus videlicet Hermanni bone memorie quondam nati Przybysslay pie recordacionis, qui quondam tenuerunt residenciam corporalem in castro Rosenberch, mea omnium predecessorum suocessorumque meorum sic, quod exnunc me uiuente et post mortem meam perpetuis temporibus percipiat omni anno dictus plebanus prouentus dicti prati et ecclesia supradicta. Et quia nobilis animus nouit refundere beneficium, quod accepit, ipse plebanus ecclesie prius dicte videlicet in Rosenberch se michi firmius astrinxit promittens nomine suo et suorum omnium suoccessorum plebanorum seu legittimorum rectorum superius dicte ecclesie, quod singulis annis in die sancti Galli ipse plebanus cantabit et omnes successores sui uigilias defunctorum cum nouem lectionibus, datis etiam quatuor candelis ad dictas vigilias ardentibus, et in crastino sex missas defunctorum tenebit, uocatis sacerdotibus et rogatis, qui dictas missas fuerint celebraturi, qui quidem sacerdotes dictas missas officiantes Hermanni mee progenitorum successorum meorum et omniuin fidelium defunctorum habentes memoriam animarum deo patri hostiam offerant salutarem. Quos quidem etiam sacerdotes iam numeratos uocatis etiam decem pauperibus promittit pascere supradictus plebanus ac reficere in prandio laute et honeste. Verum si iam dictus plebanus predicti promissi aliquid infringeret ita, quod die prefixa dictum seruicium uel sequenti tercia quarta quinta sexta septima et maxime octaua die cum refectione prius dictorum sacerdotum et pauperum facere negligenter obmitteret, extunc evolso vno mense amota omni crastinacione obligauit se et successores suos plebanos ad penam sexaginta denariorum Wyennensium pro dicta ecclesia daturum. Sin autem hoc idem pluribus mensibus facere neglexerit, prius dicte pene promittit se et successores suos subiacere tam diu, quousque singula predicta ipse et sequaces sui cum effectu fuerint exsecuti. Vitricus autem ecclesie eiusdem in Rosenberch plenum posse monendi cum ceteris ciuibus de pena obligata habebit. Et ut testamento ordinationi legacioni et statuto predictis nullus aliquando ualeat contraire sigillum meum vna cum sigillis dominorum videlicet nobilis viri domini Petri de Rosenberch domini Marquardy de Poressyn Marquardi de Metlyn et Vlrici filii mei presentibus est appensum. Datum et actum anno domini M^o CCC^o lxj^o.

Source Fulltext: PANGERL, Stift Hohenfurth (=FRA II/23, Wien 1865) S. 123--124