Ich Petter von Munichen vnd mit sampt mir mein hausvraw, Torochtea vnd alle vnser erben veriehen offenbar vnd tuen chuent allen den, dy den brief sechent oder hoerent lesen, dy nvn sind oder hernach chuftig werdendt, daz ich verchauft han mit verdachtem mut vnd mit meiner vreunt rat czv der czeit, do ich es wol getuen macht, prueder Perichtram munich in dem chloster dacz Hachenfuert an czwen sibenezk grazz Prager munzz vnd vier phenning Wienner munzze cze Hodanicz in dem dorf vmb czweliff schok vnd czwainczk grazzer phenning auch Prager muzze (sic); vnd dazselb egenant gelt schol ich dem erbern hern auzrichten an alle seinn schaden, als lancz recht ist. Vnd daz egenant gelt, alz vor verschriben ist an dem brieff, schol dienn nach dez erbern hern prueder Perichtram tod in daz siechhaus dacz Hachenfuert den chranchen hern cze pezzrung irr phruent, vnd dapei schol man gedenchen dez egenanten prueder Perichtrams vatter sel vnd aller seinner vorfadern sel alle jar jerchleich. Vnd daz dy red stet vnd vnzebrochen peleib, dar vber gib ich vorgenanter Petter von Munichen dem erbern geistleichen hern hern Perichtram den brief versigelt mit meim anhangvnden insigel. Vnd dez sind geczeug von erst mein prueder Vlrich von Munichen auch mit seim anhangvnden insigel vnd Vlreich von Trochaw auch mit seim anhangvnden insigel in an schaden. Der brief ist geben do man czalt von Christes gepuerd dreuczechen hundert iar vnd dar nach in dem syben vnd sechczisten jar an sand Grogorgen tag.||
.

Source Fulltext: PANGERL, Stift Hohenfurth (=FRA II/23, Wien 1865) S. 137-138