Nos Petrus de Rosemberch prepositus capelle regie omnium sanctorum in castro Pragensi notum facimus vniuersis, ad quos presentes deuenerint, quod cum super causis litibus et controuersiis, que inter religiosos fratres abbatem et conuentum monasterii Altiuadensis ex vna et dominum Petrum plebanum ecclesie in Horicz super vna domo cum suis pertinenciis ibidem in Horicz sita parte vertebantur ex alia, in nos tamquam arbitrum arbitratorem et amicabilem compositore m beniuole et concorditer extitisset compromissum, tandem nos matura deliberacione digestoque consilio prehabitis diligentique scrutinio seu inquisicione preuia virtute huiusmodi compromissi pronuncciauimus in hunc modum, quod memoratus dominus Petrus plebanus prefatam domum in Horicz cum suis pertinenciis a data presencium ad octo annos continuos, si vixerit, tenere aut possidere debeat pacifice et quiete, de ipsaque mediam libram denariorum in die natiuitatis domini annis eisdem vno contextu ac indiuisim iam dictis abbati et conuentui censuare. Cum autem dictum spacium octo annorum fuerit elapsum aut ipse dominus Petrus de hoc seculo infra eorundem annorum decursum de hoc seculo migrauerit, extunc huiusmodi domus cum vniuersis suis pertinenciis, de qua lis et questio vertebatur, ad abbatem et conuentum Altiuadensem predictos qualibet renitentia non obstante ad ipsorumque possessionem ac dominum omnimode debet reuerti et amplius per ipsos abbatem et conuentum iuxta libitum voluntatis eorum quibuscumque personis per eos locari. Quam quidem pronuncciacionem et arbitrium nostrum premissum prefate partes ibidem tunc presentes emologauerunt (sic) ipsamque ratam habuerunt et gratam. In cuius rei testimonium et robur sigillum nostrum vna cum sigillo domini Petri plebani iamdicti necnon in testimonium sigillo domini Hostanconis duximus presentibus appendendum. Datum Chrumpnaw anno domini millesimo trecentesimo septuagesimo primo feria quinta infra octauas pasche.

Source Fulltext: PANGERL, Stift Hohenfurth (=FRA II/23, Wien 1865) S. 150-151