Ego Johan de Dubova ad vniuersorum noticiam tam presencium quam futurorum disposui peruenire, quod compos rationis existens propria desuperque suadela amicorum meorum preuia honesto et discreto Wankoni de Elenyc suisque natis et nascendis heredibus curiam meam liberam in villa Ziestow cum agris cultis et incultis pascuis omnibus et singulis prouentibus, in quibuscumque rebus aut substanciis nunc et denuo temporis successu instante consistant, ad ipsam spectantibus hereditarie et de spontanea voluntate pro viginti octo sexagenis grossorum Pragensium denariorum integre a dicto Wankone perceptorum presentibus recognoseo me rationabiliter vendidisse iuste uendicionis titulo resignando. Et ne huiusmodi uendicio in antea in irritum quomodolibet deueniret et inane, cum discretis Jendlino de Chwalin fratre meo karissimo, Smilone de Rowna, Johanne de Bor alias de Rowneho dicto, Raczkone de Hor, curiam suis cum pertinentiis predictam pre impeticione vxoris mee, a qua dictam curiam cum omnibus usufructibus in accessu matrimonialis copule percepi in possessionem, cuiuslibetque hominis et persone iure terre regni Boemie ab olim vsuali er approbato spondeo disbrigare. Nos quoque Jendlinus de Chwalin, Smilo de Rowneho, Johannes de Bor, Raczko de Huor, prenominati profitentes pretacte curie alodialis eo, quo prefertur, jure nos fore disbrigatores legittimos vnacum predicto Johanne de Dubowa omnium seriatim premissa hic contenta manu coniuncta et indiuisa solidaque fidei firmitate promittimus obseruare. Si uero nequiremus aut non curaremus exbrigare memoratam curiam alodialem, quod absit, aliquopiam impetente uel impetentibus extunc preallegato Wankoni aut suis heredibus de tanta hereditatum nostrorum quantitate parte tercia euidenter superaucta, vbicunque in nostris bonis generaliter congruencius uisum fuerit, ipsi Wankoni sine quauis uerborum aut operum obuencione se intromittendi damus potestatem plenam. Alioquin ob non resignacionem partis tercie adaucte eo, quo prefertur, modo duo ex nobis, qui fuerimus ammoniti, in domum idonei hospitis in ciuitate Chrumpl. ad instanciam Wankonis prefati ad prestandum obstagium debitum et cosuetum (sic) dolo et fraude quibusuis procul motis tenebimur subintrare et abinde non exire, quousque pars tercia adaucta cum suo primitiua eidem per nos resignata fuerit et singula dampna exinde contracta et legittime demonstrata ipsi per nos fuerint persoluta. In cuius rei euidenciam et robur proinde ualiturum sigilla nostra cum sigillo pretaxati Johannis de Dubowa presentibus duximus appendenda, Sub anno domini millesimo trecentesimo lxx. secundo feria secunda in crastino sancte trinitatis.

Source Fulltext: PANGERL, Stift Hohenfurth (=FRA II/23, Wien 1865) S. 155-156