Nouerint vniuersi tam presentis temporis homines quam futuri ad quos presens scriptum fuerit deuolutum, quod ego Wilhelmus de Laucaw in lecto egritudinis mee constitutus sanus tamen mente congruaque ratione pervsus cogitans ac mente reuoluens, quod non sit melior ac salubrior animarum exulancium consolacio quam virorum religiosorum in Christo deuotorum frequens et assidua oratio. Igitur ego Wilhelmus prefatus ordinaui et disposui testamentum meum atque vltimam meam voluntatem religiosis viris fratribus abbati et conuentui monasterii in Altovado ordinis Cysterciensis pro pitancia et recreacione perpetuis temporibus in die aniuersarii mei vnam sexagenam grossorum Pragensium denariorum census siue pensionis perpetue tollendam habendam et recipiendam in villa Rancziez videlicet quadraginta quatuor grossos Pragenses in hominibus censuandis, scilicet in Nieolao dicto Cocziezka et Stephano fidelium incolarum per me deputatis, quorum hereditates hereditatibus Nicolai et Andree contingunt, et residuos uero sedecim grossos, numerus vnius sexagene, vt inpleatur census predicti per me legati et dispositi, fideliter de bonis propriis ordino annis singulis. ut fratribus prefatis in Altovado tempore debito soluant et complete sine omni contradictione qualibet expediant, heredes mei et expedire habent successores uel bonorum meorum hereditarii, qui fuerint et legittimi possessores, tamen sic dispono et habere volo, quod heredes mei et successores, quandocunque voluerint et potuerint, solummodo et tantum iam dictos sedecim grossos cum tribus sexagenis grossorum Pragensium circa ipsum abbatem et conuentum debent exsoluere atque possunt et ipsi eisdem sexagenis cum tribus alium censum sedecim grossorum certum emendo tenebuntur comparare. Eciam lego dispono et ordino in villa Schestaw pro remedio et salute anime honesti viri amici mei bone recordacionis Jenischii de Mesipoczye viginti quinque grossos perpetui census in dimidio laneo tenendos, quem Andreas dictus Twaroch possidere dinoscitur, cuius quidem dimidii lanei fines agris uel hereditatibus Wanconis Sdenconis et Vlrici dicti Heureufel sunt contingentes. Ita videlicet, vt in festo quolibet sancti Dyonisii in die aniuersarii mei memoriam anime mee predecessorumque meorum in missis et orationibus eorum iuxta debitam ipsorum exigentiam ordinis perpetuo ac iugiter debeant habere, similiter in festo quoque natiuitatis beate virginis Marie aniuersarium annis perpetuis Jenischio et memoria salutaris sorumque predecessorum sint deuote celebraturi. Et ut conuentus eodem in tempore communiter in refectorio in victu temporaliter ac corporaliter de prouidencia ipsus pitanciarii, qui pro tempore fuerit, primo in die aniuersarii mei honestius et melius, sicut fieri poterit, de vna sexagena grossorum Pragensium denariorum deinde in die aniuersarium Jenischio cum peragetur, de viginti quinque grossis denariorum Pragensium eorundem pie ministrando recreetur. Quapropter ego Johannes de Laucaw recognosco per presentes publice et fateor in hiis scriptis voluntatem et ordinacionem genitoris mei Wilhelmi pie recordacionis prefati, quam fecit et disposuit pro salute anime sue predecessorumque suorum necnon Jenischii prenominati cum ceteris amicis meis subnotatis ratam habere atque gratam et perpetue inuiolabiliter obseruare ymmo fide pura sine omni dolo et fraude predictis dominis et fratribus cenobii in Altovado, quandocunque emptionem pro censu aliquo ipsis, qui placebit, fecerant et me de illis supradictis tribus sexagenis, de quibus census sedecim grossorum Pragensium a bonis michi, que pater dimisit et reliquit, diruantur, habuerint monitum infra spacium xii^cim ebdomadarum uel trium mensium ipsas promitto sine omni protraccione cum promptis tantum fideliter numerando expedire, uel si placebit ipsos circa venditores ipsorum de iam dictis tribus sexagenis grossorum facere quittos liberos omnino et solutos. Si uera negligencia quocunque modo aliqua hoc facere et inplere tardarem, extunc ego Johannes prefatus uel aliquis amicorum meorum de infrascriptis vnus cum equo tantum reuolutis habita monicione tribus mensibus complete statim in ciuitate Rosenberchk ad prestandum obstagium solito more et consueto in domum honesti hospitis, que sibi demonstrata fuerit, intrare debet et exinde nullatenus exire tamdiu, quousque de dampnis singulis, que dixerint se percopisse (sic), ipsis fuerit et de pecunia capitali plenariter satisfactum. Tamen ita, quod sepedicti fratres diem anniuersarium patris mei et suorum predecessorum meorumque amicorum et Jenischii, secundum quod prius est expressatum perpetue sint celebraturi. In casu uero, vbi ipsi hoc non facerent, quod tunc amicus noster propinquior potest ac licite poterit vnum quemcunque hominem censualem monasterii uel duos in ciuitatibus seu locis propriis pro vno fercone grossorum gratia nulla mediante tantum arestare. Et hoc singulis annis amicus noster habet facere in casu, vbi negligentia quecunque in anniuersario patris mei et Jenischii committeretur, similiter faciendo, quousque pitancia dandi obmissa ad plenum restauretur. Et ut testamento ordinacioni legacioni statuto et promisso predictis nullus aliquando valeat contraire vel se opponi, sigillum meum vna cum sigillis amicorum meorum videlicet honorabilis viri domini Bohunconis plebani in Budweys Prziblini de Petrowitz et Johannis de Swietow presentibus sunt appensa. Datum anno domini millesimo trecentesimo septuagesimo quinto feria sexta in die sancti Vrbani pape et martiris gloriosi.

Source Fulltext: PANGERL, Stift Hohenfurth (=FRA II/23, Wien 1865) S. 164-166