Nos frater Otto abbas totusque conuentus monasterii in Altouado ordinis Cysterciensis Pragensis dyocesis tenore presencium protestamur vniuersis, quod honesti viri dominus Zytwinus de Ebnaw, Benechsius de Herslag, Quonradus de Troyanow, Nicolaus de Perne et Dworsata de Herslag, filii domini Gregorii pie recordacionis de Herslag, donauerunt nobis et monasterio nostro viginti quatuor sexagenas grossorum Pragensium paratorum, pro quibus cenobio nostro ad officium pitancie nostre certos redittus perpetue comparare debemus, volentes eciam pro temporalibus bonis spiritualia recompensare, prout decet, beniuole subicimus nos ad tale onus, vt in altari sancti Wenceslai ibidem in nostro monasterio singulis ebdomadis quatuor missas pro salute eorum et animabus predecessorum ipsorum celebrare promittimus sine intermissione. Quod si vmquam, quod absit, obmitteremus causa quacunque emergente, extunc prior noster, qui officium huiusmodi instaurare debuit et neglexit et post ternam monicionem non recuperauit, omnino de officio prioratus mox debet deponi. Insuper fatemur, quod pro decima in curia Herslag donata monasterio per dominum Czenconem et Dominicum eorum predecessores tenemur et obligamur, singulis diebus perpetue vnum lumen in summo altari in choro infra officium misse pro eisdem predecessoribus instaurare et fouere. Harum nostrarum testimonio litterarum cum nostrorum apensione sigillorum. Datum et actum anno domini M^o CCC^o lxxvj^o in die circumcisionis domini.

Source Fulltext: PANGERL, Stift Hohenfurth (=FRA II/23, Wien 1865) S. 168-169