Nos Pesico de Vsdiczowa Nicolaus de Meczikowa et Gregorius de Passowar frater germanus Weczlonis infrascripti recognoscimus tenore presencium vniuersis, quod Weczlinus de Cypin amicus noter fidelis et specialis sua de bona voluntate et ex animo deliberato suorum quoque amicorum de consilio singulari nobis suis tamquam amicis singularibus omnia bona sua mobilia et inmobilia, que ibidem in Cypin et vbilibet locorum dinoscitur habere, presencia et etiam in futurum habitura intabulauit tabulis terre nostre Bohemie et inscripsit ad manus fideles jure et consuetudine nostre terre. Cui etiam vice versa similiter omnia nostra bona sibi intabulauimus jure eodem. Ne igitur idem Weclinus ratione dicte intabulacionis in aliquo fraudetur et anobis aliquid moleste paciatur, promittimus omnes in sollidum manu coniuncta sine dolo ipsi Weclino et suis heredibus legittimis , quod ad ipsa bona nullo modo nos volumus trahere nec quidquam violenter vsurpare de ipsis ratione dicte intabulacionis, quampiu ipse et sui heredes vitam duxerint presentem sub ratione sana. Post mortem vero ipsius et suorum heredum primo et principaliter ad ipsum Gregorium fratrem ipsius prescriptum deuoluetur demum, tunc post mortem Gregorii ad nos reliquos hic scriptos et nostros heredes driuabuntur (sic) jure tabularum, licet licebit quoque predicto Weclino et suis legittimis heredibus, predicta sua bona in morte et ante mortem iuxta suam voluntatem dare vendere commutare seu testari parum uel multum suis aut extraneis secularibus aut spiritualibus seu quibuslibet aliis. Et nos in nullo horum debemus nec poterimus ipsum aut suos legittimos successores impedire ymo verius promouendo et ad effectum totalem deducendo. Et si prefata bona ad nostram deuenerint possessionem, promittimus omnia et singula eorum ordinata et commissa ac testata finaliter terminare et expedire in nullo eius et eorum voluntatem inmutando, quatenus in nobis et in eorum bonis poterit stare et terminari. Item promittimus eidem Weclino ac suis heredibus omnes in solidum manu coniuncta sine dolo, quod quicunque nos ipsi aut alius suo nomine moneret aut a nobis exigeret, quod sibi aut suis heredibus rationem habentibus prelibata bona libera dimitteremus, extunc statim tenemur, proximis quatuor temporibus post ipsam monicionem ad tabulas terre accedendo expedire et extabulare nichil nobis in eis reseruando sine omni dolo, sub ipsius tamen impensis pro extabulacione, verumtamen nobis per vnam sexagenam grossorum Pragensium pro expenssis dabit cuilibet, sine quo prefata libertacio fieri non posset. Et si hisdem quatuor temporibus hoc fieri non posset, tunc sequentibus mox sine dolo id debemus terminare. Et hec singula et omnia, prout sunt prescripta, promittimus omnes in solidum sine dolo omni fideliter exequi et obseruare. Et quicunque ex nobis aliquid aliud faceret et facere uel obmittere attemptaret, quod absit, vadium ducentarum sexagenarum grossorum incurreret et omnia bona sua mobilia et inmobilia prelibato Weclino aut suis heredibus infiscarentur et appropriarentur nulloque se jure poterit defendere. Ymo nos reliqui promittimus et tenemur sepefato Veclino (sic) et suos adiuuare dictum vadyum et bona oecupare et possidere. Quod si quidquam in premissis non faceremus seu negligentes essemus, quod absit, extunc statim duo ex nobis, quicunque forent nominati, quilibet cum duobus famulis et quatuor equis vnus alium non expectando nec se per alium excusando, ad obstagium debebunt subintrare ciuitatem Wsk super Lusnycz sitam ad hospitem probum nobis per ipsos ostensum et inde nullatenus exire, quousque omnia et singula prout sunt hic expressa fuerint finaliter sine dolo expleta. Denique prestito obstagio uel non prestito elapsis quatuordecim diebus, si dum omnia et singula non fuerint adinpleta, extunc licebit sepedicto Weclino siue suis heredibus omnia predicta vna cum omnibus dampnis rationabiliter demonstratis inter Judeos conquirere seu Christianos in nostra dampna et non sua. Et nos contra hec nichil poterimus obloqui seu contradicere alias, si quidquam contra omnia premissa faceremus, hoc contra fidem et nostrum honorem faceremus. Sed quia volumus omnia hec firma et rata obseruare, nostris sigillis appensis de nostra certa sciencia jussimus presencia roborare. Datum et actum anno domini millesimo trecentesimo nonagesimo in epiphania domini Jesu Christi.

Source Fulltext: PANGERL, Stift Hohenfurth (=FRA II/23, Wien 1865) S. 208-210