Ego Johannes dictus Borowetz de Rowna, quia de licencia et permissione gratiosa serenissimi domini nostri regis Wencezlai bona mea, que in dicta villa Rowna possideo, dare seu testari, cui voluero, possum, sicut suis lilteris hoc mihi dignatus est confirmare, quarum quidem litterarum etiam tenor ob maioris certificacionis euidenciam per omnia sequitur in hec verba: [Folgt die Urkunde N. CXCVII inserirt]. Idcirco ego ipse prefatus Johannes Borowetz de Rowna singulis ac vniuersis, tam qui pro nunc sunt, quam in posterum futuris, per hec infrascripta notum facio et recognosco publice ac manifeste, quod deliberato animo sanoque et maturo amicorum meorum consilio necnon heredum meorum, quorum quomodolibet (?) interesse poterit, precipue tamen et expresse fratris Lamberti filii mei in Mylawsk ordinis Premonstratensis professi, Margharete quoque vxoris mee, sed et Agnesce ac Offzce ambarum filiarum mearum plenaria liberaque voluntate et consensu curiam meam in prefata villa Rowna cum omnibus iuribus et iurisdictionibus ad eandem pertinentibus seu spectantibus, videlicet censibus et censualibus agris pratis pascuis siluis rubetis cultis et incultis riuis piscacionibus omnibusque ac singulis terrenis vsufructibus, quocunque soleant debeant uel possint nomine dici seu nuncupari, prout hactenus ego atque supradicti mei censuales ea cum omnibus suis pertinenciis usque in hanc diem habuimus tenuimus ac possedimus pacifice et quiete, honorabilibus et religiosis viris domino Stephano abbati et conuentui monasterii Sancte Corone ordinis Cysterciensis Praghensis dyocesis ex die presenti nunc (?) et deinceps temporibus perpetuis libere quiete ac pacifice tenendam habendam possidendam atque fruendam trado et condescendo deputo et assigno, ita ut nullus vmquam hominum, cuiuscunque status condicionis gradus siue sexus existat, pro supranominatis bonis uel qualicunque eorum parte prescriptos dominum abbatem, uel qui pro tempore fuerit, siue conuentum iuris quippiam nec potestatis habere possit uel debeat ammouendi impetendi molestandi neque etiam inferendi dampnum quodcunque siue grauamen. Ad veriorem eciam confirmacionis certificacionis bona hac eadem tabulis terre inscribi eis feci et intabulari. Vt vero iamdicta huiusmodi mea tradicio condescensio deputacio assignacio et intabulacio inconuulsa perpetuo et indistracta permanere nec cuiusquam hominis contradictione renisu uel obsistencia irritari quoquo modo possit aut infringi, supplicaui nobili et generoso domino domino Henrico de Rosenberg necnon strennuis et honestis viris domino Marchwardo militi de Poressyn, Pessykoni de Dudlyb et Myxikoni de Myssnytz generis meis, quatenus sigilla sua vna cum sigillo meo presentibus appenderent in testimonium premissorum, quod et libenter beniuoleque facere curauerunt. Nos quoque Henricus de Rosenberg, Marchwardus de Poressyn, Pessyko de Dudlyb et Myxiko de Myssnytz recognosciraus et fatemur, quod de certa nostra sciencia bonaque voluntate et consensu sigilla nostra vna cum sigillo sepedicti Johannis Borowetz in eorum, que sunt prescripta, testimonium presentibus fecimus appendi. Datum anno domini millesimo quadringentesimo sexto in festo purificacionis beate virginis Marie.

Source Fulltext: PANGERL, Stift Hohenfurth (=FRA II/23, Wien 1865) S. 240-242