Sbinco dei gracia sancte Pragensis ecclesie archiepiscopus et apostolice sedis legatus vniuersis Christi fidelibus, ad quos presentes peruenerint, salutem in filio virginis illibate. Gloriosus deus in sanctis suis et in maiestate mirabilis, quamuis cunctos sanctos suos altis decoret insigniis et celestis beatitudinis efficiat possessores, speciali tamen prerogatiua excellencium meritorum matrem suam beatissimam Mariam virginem benedictam reginani angelorum et gencium dominam, que eum castis concepit visceribus et post partum virgo permansit, a Christi fidelibus censuit venerandam. Cupientes igitur ut monasterium Altiuadense ordinis Cisterciensis nostre Pragensis diocesis in honore sancte dei genitricis predicte dedicatum, in quo eciam, ut accepimus, quedam ymago eiusdem dei genitricis virginis Marie, ymaginem aliam saluatoris domini nostri Jesu Christi de cruce depositi in sinu suo tenens in quadam columpna erecta est, ad quam Christi fideles deuocionem gerunt pre ceteris ymaginibus specialem, ab ipsis Christi fidelibus tanto visitetur frequencius et congruis attolatur honoribus, quanto magis inibi confluentes se donis spiritualibus senserint consolatos, omnibus vere penitentibus contritis et confessis, qui coram prescripta ymagine virginis a die sancto pasche usque ad festum penthecostes annis singulis illam angelicam antiphonara scilicet "Regina celi letare“, humiliter decantauerint, seu qui huiusmodi cantui ex deuocione interfuerint, item qui per circulum anni ante quodlibet altare in dicto monasterio vnum "pater noster“ et vnum "aue Maria“ ad laudem dei omnipotentis et beate Marie virginis flexis genibus in humilitate spiritus annis singulis tociens quociens orauerint, de quolibet altari in dicto monasterio sito, de omnipotentis dei misericordia et beatorum Petri et Pauli apostolorum eius meritis et intercessione confisi quadraginta dies indulgenciarum de iniunctis eis penitenciis in domino misericorditer relaxamus. Insuper quicunque pro salute animarum genitoris et aliorum predecessorum nobilis domini Heinrici de Rosenberg in dicto monasterio sepultorum vnum "pater noster“ et vnum "aue Maria“ cum deuocione dixerint, tociens quociens idipsum fecerint, ipsis quadraginta dies indulgenciarum similiter elargimur, omnes alias indulgencias dicto monasterio per quoscunque antistites catholicos datas uel forte imposterum conecdendas ex certa nostra sciencia ratificantes et presentibus in dei nomine approbantes. In cuius rei testimonium presentes litteras fieri et sigilli nostri appensione iussimus communiri. Datum in Crumlow anno domini millesimo quadringentesimo vndecimo die decima septima mensis Februarii.

Source Fulltext: PANGERL, Stift Hohenfurth (=FRA II/23, Wien 1865) S. 252-253