Jch Chunrat Pällsterl von Newndorf ich Anna sein hawsfraw veriehen für vns vnd all vnser frewndt vnd erben vnd tuenn kund offenlich mit dem brief allen lewten, daz wir mit wolbedahtem muet nach rat gunst vnd willen vnsrer nachsten pestten frewnt vnd erben ze der zeit, da wir das mit recht wol getuen mochtten, awf vnser haws vnd hofstat ze Newndorf gelegen zenachst der viechtrifft an aynem tail vnd Tomann des Swartzzen an dem andern tail rechtt vnd redleich gelegt haben vnd legen auch wissentlich mit chraft des gegenwürtigen briefs zehen pfenning Wienner munzz zu rechtem purkchrecht an sand Cholmannstag ze geben in Reichersperger hof ze Krems. Darzue haben wir auch auf das benant vnser haws vnd hofstat ze dienst gelegt vnd legen auch aber wissentlich mit dem brief drey schilling gueter vnd gäber Wienner pfenning an sand Merteins tag zue dem liecht in sand Mertteins chappeln auch in Reichersperger hof doselbs ze Krems. Als wir dann die yeczgenanten drey schilling Wienner pfenning vorher in den benanten hof zu der egenanten chappellen geben vnd dient haben von zwyn kchueen von sechs schaffen vnd von aynem peynstokch, so die erber fraw Margret die Reicherspergerinn sealige geschafft vnd hinder ir lassen hat ewichleich ze beleiben. Das obgenannte purkchrecht vnd den dienst sullen vnd wellen wir vnd vnser nachkomen besizzer vnd inhaber des egenanten hawss vnd hofstat hinfür ewichlich an alles abkauffen raichen vnd dienen zu rechtter dienstszeit, als dann oben berürt ist vnuertzogenlich. Täten wir des nicht, so veruellt sich wanndl darauf als auf ander versessen purkchrecht vnd dinst in dem lannd ze Oesterrich. Wir verpflichten vns auch nichts mer vber das egenant purkchrecht vnd dinst, vnd darüber ze vrkund geben wir der obgenanten sannd Merteins chappeln vnd verweser des egenanten Reichersperger hofs den offen brief besigelten mit der erbern weisen Petern des Pältleins die zeit veldrichtter innerhalb des Kamps vnd Steffann des Ffuetrer die zeit obristen spitalmaister ze Krems anhangunden insigeln, die si durch vnsrer vleizzigen pet willen der sach zu einer gedechtnusse an den brief gehangen habent, in paiden vnd iren erben an schaden. Darunder wir vns verpinden mit vnsern trewn an aids stat, alles das staet ze haben vnd ze volfueren, das an dem brief beschriben stet. Geben nach Krists gepurd viertzehenhundert jar vnd darnach in dem aindleften jar an nachstem montag vor der aindlefttausent maid tag.

Source Fulltext: PANGERL, Anhang Stift Hohenfurth (=FRA II/23, Wien 1865) S. 403-404