Ladislaus dei gracia Hungarie Bohemie Dalmacie Croacie etc. rex Austrie dux et Morauie marchio etc. notum facimus vniuersis, quod cupientes diuinos honores et solemnia sacra augeri, deliberate et sano nostrorum procerum et fidelium accedente consilio de certa nostra sciencia auctoritate regia Bohemie licere permittimus ac nostrum regium consensum expresse damus et libere impartimur ecclesie parochiali sancti Nicolai in Rosennbergk, vt possit recipere capere habere et tenere vltra eos, quos hactenus habet, duodecim sexagenas grossorum annui census, quocumque titulo voluerit et a quibuscumque personis et super quibuscumque bonis sibi placuerit, bonis feudalibus dumtaxat exceptis, quas duodecim sexagenas annui census, postquam simul vel disiunctim quouis iusto titulo habuerit, eidem ecclesie exnunc prout extunc vnimus annectimus et incorporamus ac volumus, ecclesiam ipsam libertates immunitates et omnia jura aliorum similium censuum ecclesiasticorum in censibus antedictis pacifice et sine impedimento habere. Comittimusque ac mandamus vrzednikonibus ceterisque officialibus tabularum terre regni nostri Bohemie nec non notariis et prothonotariis earundem, qui nunc sunt vel inposterum erunt, fidelibus nostris dilectis, vt cum cognouerint, predictos census modis premissis ad antedictam ecclesiam simul vel particulariter deuenisse, et ab eiusdem ecclesie rectore vel altero eius nomine requisiti fuerint, prefatis tabulis ipsos annotare atque inscribere non omittant. Presencium sub appensiono nostri regalis sigilli testimonio litterarum. Datum Wienne die vigesima secunda Augusti anno domini millesimo quadringentesimo quinquagesimo septimo regnorum nostrorum anno Hungarie etc. decimo octauo, Bohemie vero quarto. Ad relacionem domini Procopii de Rabenstein cancellarii.

Source Fulltext: PANGERL, Stift Hohenfurth (=FRA II/23, Wien 1865) S. 293