Frater Johannes abbas Morimundi Cistereiensis ordinis Lingonensis dyocesis plenaria auctoritate domini et capituli generalis Cisterciensis in regno Bohemie marquionatu Morauie et generaliter in tota nacione Germanica fungens cum potestate vices nostras committendi venerabili patri et in Christo nobis carissimo coabbati nostro monasterii de Altouado nostri prefati ordinis Pragensis dyocesis salutem et in commissis fidelem adhibere diligenciam. Propter varias occupaciones ordinis, in quibus ad presens occupamur, officio reformacionis vbilibet attendere non valemus, eapropter de vestra discrecione ad plenum confidentes breui tenore presencium vobis committimus visitacionem et reformacionem omnium et singulorum monasteriorum vtriusque sexus in predicto regno Bohemie et marquionatu Morauie cum potestate visitandi reformandi corrigendi iustituendi et destituendi omnia et singula, que vobis videbuntur esse visitanda reformanda corrigenda instituenda et destituenda, tam in capite quam in membris, tam in spiritualibus quam in temporalibus, in predictis monasteriis et personis eorundum cum potestate, abbates abbatissas et officiales dictorum monasteriorum, si sua demerita exignant (sic), deponendi resignaciones eorum acceptandi et nouos instituendi iuxta ordinis nostri formam consuetam cum potestate eciam, personas prefatorum monasteriorum absoluendi a casibus ordini nostro reseruatis et cum eisdem disponendi super irregularitatibus, si quas contraxerint, cum potestate eciam, recipiendi contribuciones nouas et antiquas ab eisdem monasteriis ordini debitas et de receptis quittancias dandi et eosdem abbates compellendi ad mittendos scolares in aliquam vniuersitate (sic) signanter Viennensem sub penis excommunicacionis et aliis ecclesiasticis censuris, recipiendo (sic) eciam ab eisdem subsidia debita, prout in registro vestro taxantur. Rebelles vobis super premissis et inobedientes monicione preuia tam auctoritate apostolica ad hoc ordini nostro concessa quam auctoritate capituli generalis hiis inscriptis excommunicatos denunciamus, vobis absolucionem reseruantes satisfactione tamen preuia. Et quia nullus tenetur propriis stipendiis militare sub inobedientie et excommunicacionis late sententie penis precipimus abbatibus abbatissis et officiariis prefatorum monasteriorum, quatenus vobis aut vestro nuncio ad plenum satisfaciant de expensis racionabilibus occasione premissorum factis fiendis. Et generaliter damus vobis plenariam auctoritatem faciendi gerendi et exercendi circa premissa et ea tangentia, quitquid nos auctoritate qua supra facere gerere et exercere possemus, si presentes essemus. omnibus igitur et singulis sepedictorum monasteriorum regularibus personis sub pena excommunicacionis late sententie precipimus et mandamus, quatenus vobis tamquam nobis pareant et obediant humiliter et deuote, presentibus per quinquennium in suo robore duraturis. Datum in eodem monasterio de Altouado sub appensione sigilli nostri, sexta decima die mensis Maii anno domini M^o CCCC^o quinquagesimo septimo. F. de Marchia m. p.

Source Fulltext: PANGERL, Stift Hohenfurth (=FRA II/23, Wien 1865) S. 290-292