Frater Johannes abbas Morimundi Cisterciensis ordinis Lingonensis dyocesis venerabili patri et in Christo nobis carissimo coabbati nostro monasterii de Hylaria eiusdem nostri ordinis Patauiensis dyocesis spiritum caritatis et pacis. Scitis, quantum inhonestum est, viros religiosos litigiosos fore aut auaricie notam incurrere, vt pote buibus viuere Christus est et mori lucrum. Auditis igitur vestris peticionibus, quibus exigebatis a venerabilibus patribus domino abbate et officiariis monasterii beate Marie de Altouado filie vestre quatuordecim libras seu talenta monete Viennensis pro et ex occasione reuerendi patris domini episcopi Salonensis, auditis eciam responsionibus predictorum patrum discernimus et sentencialiter per hec nostra scripta indicamus, prefatos patres sufficienter et plus, quam debuerunt, vobis et vestris satisfecisse de premissis et in nullo amodo illa occasione vobis aut vestro monasterio obligatos fore. Eapropter sub inobedientie et excommunicacionis penis inhibemus vobis et vestris officiariis, ne amodo per vos aut alios directe vel indirecte sepedictos patres in aliqua causa premissorum molestare presumatis, reseruata tamen vobis actione vestra, si quam habetis contra prefatum dominum episcopum. Datum in eodem monasterio de Altouado sub appensione sigilli nostri, sexta decima die mensis Maii anno domini millesimo quadringentesimo quinquagesimo septimo.||
F. de Marchia m. p.

Source Fulltext: PANGERL, Stift Hohenfurth (=FRA II/23, Wien 1865) S. 292