Ich Khunratt vom Troyäs vnd ich Barbara von Troyas des Jorgen Grassawer eleichew hawsfraw bekennän vnuerschaidenlich mit ein ander fur vns vnd all vnser erben gegenbartig vnd khunfftig vnd tun khund offenleich mit dem brieff allen, dy in sehen horen oder lesen, alls von sollichs geschaffts vnd vbergebens wegen so vnds der edle Jorig Grassawer, dy czeit phleger czw Wytinghawssen mit gueten gewissen vernufft gunst vnd willen für maenikhleich geschafft vnd vbergeben hatt, als dan sein geschafft brieff, der er vns paiden ledikleich gegeben hatt vnd inne halt, doch in solcher mass vnd form, was der egenant Jorig Grassawer aus dem selben seinem geschafft verschaffet vnd gibt seinen khinden, oder wem oder wohyn er das verschafft vnd gibt, verrekchen vnd geben schullen; wir obgenante Khunratt vnd Barbara versprechen vnd geloben auch das alles zu verrekchen vnd zu folfueren vnd ausczerichten pey vnseren hantgegelobten trewm vnd ayd, wie wem oder wohin er das schafft vnd gibt, vnguerleich khain vercziechen darinne tun schullen noch enwellen in chainerlay weiss, sunder trewlich vnd an alles geuaer. Waer aber das wir obgenantew Khunratt vnd Barbara vnd all vnser erben gegenburtig vnd khunfftig des egemelten Jorgen Grassawer geschaefft also nicht stett hieltten vnd vollfurtten in massen, als oben beruertt ist, dan so mag vnd scholl ein yeder herr annbalt richter oder ambtmann vnder wem des egemellten Joring Grassawer erb ynd gutt ligt, so er vngeuerlich hinder lasset, es sey anligkund, oder varunndt gutt, nichts ausgenomen auff wasser auff lanntt in Beham oder in Osterreich, das alles inne haben vnd darnach greiffen, so lanng vnnczt wir obgenanntew Khunratt vnd Barbara vnd all vnser erben des egenanten Joring Grassawer geschaefft verrekchen volfueren vnd ausrichten trewlich vnd vngeuerlich. Des zu aynnem waren staten vrkhund geben wir obgenantew Khunratt vnd Warbara fur vns vnd all vnser erben den offen brieff bezeuget vnd bestaettet mit meins obgenanten Khunraten vom Troyas aygenn anhangunden insigl, vnd zu pessar zeugnuss vnd sicherhaitt hab ich egemelter Chunratt vnd ich obgenantew Barbara mit vleiss gebeten dy edlen vnd weiss Hannsen den Hollerberger vnd Oswalten avm Perig, das dy irew insigl auch zu zeugenuss angehanngen haben, doch inn vnd allen iren erben an schaden. Vnder dy insigl wir vns obgemelte Khunnratt vnd Barbara verpinden pey ynsern trewn in aydes weiss, alles das war vnd statt ze haben, das der brieff inne hallt vnd ausweist. Der geben ist, alls man czallet nach Christi gepurd vierczehen hundert jar vnd darnach in dem siben vnd funfczegisten jare an erichtag nach sanndt Jorgen tag des heylinng märträr.

Source Fulltext: PANGERL, Stift Hohenfurth (=FRA II/23, Wien 1865) S. 288-289