Alanus miseratione diuina tituli sancte Praxedis sacrosancte Romane ecclesie presbyter cardinalis uniuersis et singulis Christi fidelibus presentes litteras inspecturis visuris pariter et audituris salutem in domino sempiternam. Splendor paterne glorie, qui sua mundum ineffabili illuminat claritate, pia uota fidelium de ipsius clementissima maiestate sperancium tunc precipue benigno fauore prosequitur, cum deuota ipsorum humilitas sanctorum precibus et meritis adiuuatur. Cupientes igitur ut capella infirmorum in monasterio Altouadensi Pragensis diocesis congruis frequentetur honoribus fidelesque Christi eo libencius deuocionis causa confluant ad eandem, quo ibidem dono celestis gratie uberius se nouerint fore refectos et a Christi fidelibus iugiter ueneretur, de omnipotentis dei misericordia et beatorum Petri et Pauli apostolorum eius auctoritate confisi omnibus et singulis uere penitentibus et confessis, qui dictam capellam in sancti Thome apostoli sancti Michaelis archangeli sanctorum Barbare et Catherine virginum et ipsius capelle dedicacionis festiuitatibus et celebritate huiusmodi deuote visitauerint annuatim et ad reparacionem et conseruacionem edificii calicum librorum aliorumque ornamentorum pro diuino cultu inibi necessariorum manus quocienscunque porrexerint adiutrices, nos cardinalis prefatus pro qualibet die ipsarum festiuitatum et celebritate huiusmodi centum dies indulgenciarum de iniunctis eis penitenciis misericorditer in domino relaxamus, presentibus uero perpetuis futuris temporibus duraturis. In quorum omnium fidem et testimonium premissorum presentes nostras litteras exinde fieri nostrique cardinalatus sigilli jussimus et fecimus appensione conmuniri. Datum Rome sub anno a natiuitate domini nostri Jesu Christi millesimo quadringentesimo sexagesimo quinto die uero septima mensis Aprilis pontificatus sanctissimi in Christo patris et domini nostri domini Pauli diuina prouidencia pape secundi anno primo.

Source Fulltext: PANGERL, Stift Hohenfurth (=FRA II/23, Wien 1865) S. 304-305