Nos Thomas dei gratia abbas monasterii beate Marie virginis in Altouado ordinis Cisterciensis diocesis Pragensis, Leonhardus prior totusque conuentus monasterii eiusdem dilecto nobis in Christo Cristoforo pileatoris de Waltkirchen clerico minorum ordinum diocesis Pathauiensis salutem in domino. Laudabilia tue probitatis ac virtutum merita, quibus aput nos fide digno commendaris testimonio, nos inducunt, ut tibi reddamur ad gratiam liberales. Cum itaque tua didicimus relacione, ut asseris, milicie clericali ascribi desideres, tytulo prouisionis seu benefficio careas, nos igitur pietate moti et ne ob promocionis seu tytuli deffectum proposito tam laudabili desistas inchoato, te ad titulum mense et prouisionis nostre singulis annis superaddentes quatuor sexagenas grossorum intuitu diuine remuneracionis recipimus, volentes ut sub eius mense nostre titulo cum prenominata annuali scilicet quatuor sexagenarum pecunia a quocunque malueris canonico antistite gratiam et communionem sedis apostolice habentem (sic) sacros clericorum ordines maiores temporibus ad hoc a iure statutis successiue tamen et interpellatim valeas recipere, donec tibi per nos seu de nostri monasterii collacionibus aut alibi uel per alios fuerit copiosius prouisum; presentibus eciam protestantes talem antistitem, qui faerit auctoritatem . . . plenariam, dum tamen te ad hoc . . . abilem et ydoneum aliudque canonicum impedimentum non obstare reperierit, ad tales te sacros ordines consecrare. In cuius robur et tesiimonium presentem litteram sigillorum nostrorum appensione iussimus comuniri. Datum in preallegato nostro monasterio sub anno domini millesimo quadringentesimo sexagesimo quinto ipso die sancti Johannis ante portam latinam.

Source Fulltext: PANGERL, Stift Hohenfurth (=FRA II/23, Wien 1865) S. 305-306