Oliuarius Sabinensis, Julianus Ostiensis episcopi, Joannes tituli sancte Praxedis, Hyeronimus tituli s. Christofori, Paulus tituli s. Sixti, Gabriel tit. ss. Sergii et Bachi, Joannes tit. sancti Stephani in Celio monte, Petrus t. s. Nicolai inter imagines presbiteri, Franciscus s. Eustachii, Raphael t. s. Georgii ad vellus aureum diaconi miseracione diuina s. Romane ecclesie cardinales, uniuersis Christi fidelibus presentes literas inspecturis salutem in domino sempiternam. Tocies Christi fidelium animarum prouidemus, quoties ipsorum ad opera charitatis incitamus. Cupientes igitur ut parochialis ecclesia ss. Simonis et Jude in Rosenthal Pragensis dioecesis congruis frequentetur honoribus et Christi fidelibus jugiter veneretur reparetur et conseruetur, luminaribusque libris calicibus et aliis ecclesiasticis ornamentis fulciatur, ibique cultus augeatur diuinus, utque Christi fideles jpsi eo libentius devotionis causa confluant ad eandem ac ad praemissa manus promptius porrigant adjutrices, quo ex hoc ibidem dono caelestis gratiae uberius conspexerint se refectos, supplicacionibus etiam dilecti in Christo Sigismundi Klok dicte ecclesiae plebani inclinati de omnipotentis dei misericordia beatorum Petri et Pauli apostolorum ejus authoritate confisi, omnibus et singulis utriusque sexus Christi fidelibus vere paenitentibus et confessis, qui dictam ecclesiam in singulis videlicet ss. Simonis et Judae Sigismundi martyris ac feriae 2dae post festum pentecostes immediate sequentis commemorationis animarum fidelium defunctorum ipsiusque ecclesie dedicationis festivitatibus et diebus a primis vesperis usque ad 2das inclusive devote visitaverint annuatim ac ad praemissa manus porrexerint adiutrices, nos cardinales praefati videlicet quilibet nostrum per se pro singulis festivitatibus prefatis, quibus id fecerint, centum dies de iuiunctis eis penitentiis misericorditer in domino relaxamus presentibus perpetuis futuris temporibus duraturis. In quorum fidem presentes nostras literas fieri nostrorumque sigillorum iussimus appensione communiri. Datum Rome in domibus nostris anno a natiuitate domini 1484. die sexta decima mensis Aprilis, pontificatus sanctissimi in Christo patris et domini nostri domini Sixti divina providentia pape qninti anno tercio decimo.

Source Fulltext: PANGERL, Stift Hohenfurth (=FRA II/23, Wien 1865) S. 351-352