Nos Bartholomeus de Camerino per sanctissimum dominum nostrum Sixtum papam quartum commissarius et executor specialiter deputatus super execucione et expedicione indulgenciarum sancte cruciate per prefatum sanctissimum dominum nostrum papam pro fidei catholice defensione concessarum vobis omnibus et singulis, ad quos presentes nostre littere peruenerint, salutem in domino sempiternam. Noueritis, quod prefatus sanctissimus dominus noster papa considerata magnitudine calamitatis et periculi, in qua religio christiana versatur propter crebros incursus nephandissimorum Turcorum, qui quottidie nituntur orthodoxe fidei cultores inuadere et truculenta nece mactare et in sue spurcissime secte errores inducere et a veritate prefate fidei deuiare superstites, cupiens indemnitati fidei corporis animeque subditorum saluti prouidere, ut fideles ipsi ad defensionem dicte fidei prompcius assurgant, per spiritualem thesaurum militantis ecclesie, cui nunquam exhauriri potest, necessaria suffragia decreuit exquirere per plenissimas indulgenciarum gracias, invitando et exhortando per suas patentes litteras concessit omnibus porrigentibus manus adiutrices, qui per se uel alium in pecunia uel bonis aliis tantum contribuerint cum effectu, quantum in vna ebdomada pro se seque familie victu exponere consueuerunt seu quantum cum commissariis deputatis conuenerint, tam ipse quam quilibet de ipsorum contribuencium familia possint sibi ydoneum eligere confessorem presbiterum secularem vel regularem curatum uel noncuratum, qui confessione eorum diligenter audita concedere possit et valeat absolucionem plenariam omnium suorum peccatorum, quantumcumque grauium et enormium eciam si talia forent, propter que sedes apostolica esset merito consulenda, exceptis criminibus et peccatis conspiracionis in Romanum pontificem et sedem apostolicam et iniectionis manuum violentarum in episcopos et superiores prelatos, et ut possit absoluere ab omnibus censuris et penis ecclesiasticis, quibuscumque et quomodocumque contractis a iure uel ab homine inflictis seu promulgatis cum dispensacione et absolucione omnium votorum, exceptis votis dumtaxat religionis et castitatis, et cum dispensacione et absolucione omnium irregularitatum, exceptis irregularitatibus prouenientibus ex homicidio voluntario et bigamia, semel in vita et eciam in mortis articulo sepius ac pluries constitutis dicta plenaria absolucio impendi valeat, tociens quociens infirmitate grauati de morte timerent, et in aliis dicte sedi non reseruatis casibus, tociens quociens id pecierint, de absolucionis beneficio prouidere, et in uero mortis articulo plenariam omnium suorum peccatorum remissionem et absolucionem impendere. Et quia deuoti in Christo reuerendus pater dominus Thomas abbas monasterii Altiuadensis et totus suus conuentus tunc existens videlicet Andreas primus, Thomas 2^us Vincencius Jacobus Johannes primus Andreas 2^us Procopius SigismundusSixtus Johannes 2^us Vitus Henricus Paulus Bartholomeus Philippus Johannes tercius Crisfoferus Petrus Wolfgangus Gregorius Thomas conuersus sue salutis memores volentes dictas indulgenciarum gracias consequi contulerunt suam elemosinam iuxta apostolice sedis indultum, ideirco tenore presencium conmittimus et mandamus omnibus sacerdotibus electis per prefatos contribuentes, quod absoluant eligentem, ut premittitur, commutando vota, siqua emisit, in istam sanctam expedicionem iuxta tenorem litterarum apostolicarum concessarum dicte sancte expedicioni facta prius composicione cum dictis commissariis uel cum eorum substitutis super casibus sedi apostolice specialiter reseruatis. In quorum fidem presentes fieri fecimus et sigilli, quo ad hoc vtimur, impensione communiri. Datum in monasterio Altiuadensi anno domini millesimo quadringentesimo octuagesimo quarto die mensis XXVIII. Marcii.

Source Fulltext: PANGERL, Stift Hohenfurth (=FRA II/23, Wien 1865) S. 349-351