||
Wir Rudolph von Gots gnaden herczoge ze Sachsen, des heilgen Romischen reichs erczmarschalk, herczog Rudolph, sein sun, Johans, herczog ze||
Mekkelnburg , Albrecht, grave ze Anhalt und fürste ze Aschaye, und Albrecht, graf ze Muglingen und herre ze Barbey, viriehen und tun kunt ||
offenlich mit disem brive allen den, di in sehent, horent odir lesent, wann der hochgeborn fürste und unsir liber oheim, her Woldmar, marggraf||
ze Brandenburg, des heilgen Romischen reichs erczkamerer , angesehen hat die besunder gnad und hilfe, di im der allerdurchleuchtigiste fürste ||
und unsirr gnedigir herr her Karl, romischer küng, ze allen zeiten merer des reichs und küng ze Beheim, von seiner künglicher güte getan ||
hat mit trewen und mit ganczem vleizze und noch tun mag, sein land und erbe ze gewinnen, und hat im und seinen erben und nach¬ ||
komen kungen ze Beheim mit bedachtem mut und mit gutem rat, di marke ze Lwsicz mit dem lande vereygent und gegeben, mit ||
aller irr zugehörung als in den briefen, di dorubir gegeben seint volkomichlicher stet geschriben, do von geloben wir mit ganczen trewen ||
on geverd, für uns, unsir erben und nachkomen dem vorgenanten unserm genedigen herren dem romischen künge und künge ze Beheim, ||
das wir im, seinen erben und nachkomen küngen ze Beheim getrewlich und on geverd mit allir unsirr macht beholfen sein wellen und ||
schüllen, das si das vorgenante land ze Lwsicz erchriegen, und in ir gehorsam bringen in aller der mazze als di briefe, luten, di in von ||
dem vorgenanten unserm lieben oheim, marggraf Woldmarn, darubir seint gegeben. Und dornoch geloben wir mit guten trewen on alles geverd, ||
das wir das schaffin wellen und schikken, das unsir liben frünt, herczog Otte von Sachsen, herczog Albrecht von Mekkelnburg und ||
grave Woldmar ze Anhalt, fürste von Aschaye, di zu demmal nicht gegenwurtig waren, di selbe gelubden, di wir getan habn ||
in disem brive ouch tun sullen von worte ze wort, als wir und des ir besundern brief geben in allir der mazze als do vor ||
geschriben stet, und di versigiln mit irn insigiln, so wir das allirschirist gefügen und geschaffen mügen on geverd. Mit urchünd ||
diczs briefs virsiglt mit unsern insigiln, der geben ist ze Tempelberg bey Furstenwald do man czalt von Christes geburth dreuczehen ||
hundert jar, darnach in dem acht und virczgistem jar des nesten dornstages noch sand Michels tag .