||
Wir Rudolf von Gotes gnaden pfallnczgrave zu Ryn und herczog in Beyren und dez heyligen Romischen riches obrister truchseitze, bekennen uns offenlich ||
mit disem brif und dun kunt allen den, die disen brif sehent, lesent oder horent lesen, daz es zwischem dem aller durchluchtigstem fursten, unserm gnedigem hern und ||
liben sune hern Karel von Gotes gnaden Romischem kunig, zu allen ziten merrer dez riches und kunig zu Becheym, an eynem teyl und uns an dem andern umbe die ||
fruntschaft, die zwischen uns beydersiit begriffen und volfuret ist, daz er die hohgeborn Anna, unser lieb dochter, zu eyner elichen konen und wirtin genomen hat, also geteydingt, ||
geret und uber eyn komen ist, daz uns, der vorgenant unserr gnediger herr und liber sune, ob wir dez zu rat wurden, daz wir ein eliche wirtin nemen wolten, dar zu geraten ||
und beholfen seyn sol mit ganczen trewen an all geverde, und were daz wir sune gewunnen, so sol unserr lant und lute stet und vesten den selben unsern sunen verleyben bund uf si erben ||
also bescheidenlich, daz unserm vorgenantem hern volge, sein zugelt und morgengabe, die in der selben fruntschaft benant ist, der summe ist sechs tusent sweirer mark lotiges ||
silbers, die wir yn bewisen sullen und beweisen uf pfantschaft, die her nach geschriben stant uf den Hertenstein, Aurbach, Velden, daz Bleche und uf den Meydstein, und waz dar ||
zu gehoret, besucht und unbesucht ob der erde und under der erde, uf walde, wazzerr und weide, mit allen rechten und herscheften, die darzu gehorent, wer aber daz die durch¬ ||
luchtig Anna, unser libe dochter, sein elich wirtin vergienge ee, dann unser vorgnanter herr und sune so sol die selbe morgengabe yrn verleyben, die wile er lebet und nach seynem dot werden ||
unsern erben, ob wir die lazzen sunder ob der vorgenant unser her und sune mit unsern andern dochtern dheinerley gelt sy zu beraten uz geben hete, daz sol seinen erben und nachkomen kun¬ ||
gen zu Becheim von der selben morgengabe und zugelt zu vor bezalt werden und ouch ob er ichtes ubrigs uz geben hete mit den vorgnanten unsern dochtern, daz selbe sullen unser ||
erben, sinen erben und nachkomen ganczlich richten und bezalen, werr aber daz die morgengabe bezzern, werr dann daz gelt, daz unser herr und liber sune uz geben hete alz vorge¬ ||
schriben stat, sol daz ubrig alzumal volgen unsern erben, wer aber daz unser vorgenanter her und sune ee wan die vorgnant durchluchtig frowe Anna, vergienge si heten ||
erben oder nicht, so sol alle ir morgengab und leipcgeding der summe ist nun tusent mark sweirer lotiges silberz, daz er unserr dochter verschriben und bescheiden hat uf Tachowe ||
und uf Pfreymberg den burgen und uf Tachowe der stat, ritter und knechten, burgern, edeln und unedeln und uf walde, wazzer und weide besucht und unbesucht, ob der erde und ||
under der erde mit allen rechten, herscheften und mit allem dem, daz dar zu gehort, dez er sy in gewerr alz furstin leipcgedingz recht ist seczen sol, so er schirst mag an geverde hie ||
zwischen und sand Johans Baptisten tag, der schirst kumt ir volgen, die wile sy lebt und nach irern dot wider zukomen zu unserz liben hern und sunes, erben und nachkomen, werr ||
aber daz wir nach unserm dot liezzen, dochter und nicht sune sol unser lande unserr vorgnanten dochter frowen Annan alzumal an alz hindernuzze vervallen, und warten sein mit ||
allen furstentumen, herscheften, rechten, wirdigheiten und eren, die do zu gehorent und mit aller zu gehorunge, und sol unserr vorgenanter herr und sune alle ander unserr dochterr, ||
ob wir die liezzen, bestaten zu solichem furstlichem adel, alz yn gezeym ist und gelicher wise, alz er sein eygen dochtern und kinden dun wolde an alle geverde. Ouch ist ||
geret, daz alle unser burgraven und amptlut, mann, ritter und knecht, burger, edel und unedel und gemeinscheften der stete und meirkten in allen unsern furstentumen und herscheften, ||
unserr vorgenanten dochter, seyner elichen wirtin und yrn zu irrer hant geloben, hulden und sweren sullen, daz si yrn und ir und ir beyder erben nach unserm dot ob wir nicht weren, ||
und nicht sunn liezzen, alz vor geschriben stat mit allen vesten, steten und lande warten und gehorsam und underteinig sein, ewiglichen alz irrer rechter erblichen herscheften, mit ||
guten trewen an alle geverde und beynamen ist geret, daz wir dheinen burgraven noch amptman entzetsen sullen, wir haben dann bestalt, daz der ander oder die andern, ob ir ||
mer dann eyner were unserr vorgnanten dochter und ym zu irrer beyder erben hant sweren und geloben zu warten und gehorsam zu sein, als irrer herscheft nach unsern dot, alz ||
vor geschriben stat an geverde. Wer auch, daz wir die burgraven oder amptlut wandelte, so unser vorgenanter herr und sune, da bey nicht were und die nuwe burgraven und ampt ||
lut, die wir saczten, swuren und gelobten in der schicht, alz vorgschriben stat, und ym die selben nuwe burgraven und amptlut, die wir gesaczet haten, nicht behagten noch ||
gevielen, so sullen wir, wann er uns dez ermont, alz die selben burgraven und amptlut wandeln, und ander an ir stat seczen, nach sinem und unserm willen und rat an geverde, ||
wer ouch daz unser gnediger herr und liber sune und ouch die durchluchtig frowe Anna, unserr libe dochter, sein elich wirtin beydesant an leips erben, aber giengen do got vor sey ||
so sullen die vorgenanten gut beydersiit wider vallen, dannen si her komen sint, ouch sullen wir furbaz me bedesamt ewiglichen aneinander mit leip, mit gut, mit lande, vesten und ||
mit luten beholfen und geraten und verbunden sein wider allermeiniglich, nymant uz zu nemen, als verr wir daz bedersiit mit eren getun mugen an alle geverde und alle diz ||
vorgnant deidinge, verbuntnuzze, sache und stucke geloben wir dem vorgenanntem unserm hern und liben sune und er uns wider gantz steit veste und unverbrochen haben und halten, mit ||
guten trewen und mit gesworm eyde, den wir zu den henigen beidersiit mit gutem willen und mit rechter wizzen daruber und uf diz brif leiphaftig gesworn haben, und der ||
vorgenanten deitinge fruntlicher berichtung, eynung und verbuntnuzze, die zwischen uns bedersiit geschehen sint, sint gezuge die edeln hern, die her nach geschriben stant, herr ||
Burchart der Elter von Elrbach, Symont von dem Walt, ritter, Jacob von Fleirsheim, ein edelknecht, unser vant her Spynig von Hasenburg, her Buske von Wilhartize, her ||
Bernhart von Zinnenburg, ritter, Albrecht Nothaft von Dierstein, ritter, Peter, brobst zu Braczlow, meister Heinrich von Wesels, Wolfhart der Wolfhersteiner, unserr schriberr, und ||
Johans, pfarrer zum Nuwenmarkt. Zu urkunt ditz brifes, versigelt mit unserm grozzen insigel, der geben ist zu Bacherach, do man zalt nach Cristes geburt drut||
zehen hundert jar und nun und vierczig jar an der neichsten mitwochen nach dem suntag, alz man singet Invocavit in der vasten .